Անհրաժեշտ մթերքները
Տավարի կամ գառան միս- 300-400 գրամ
Հավկիթ- 2 հատ
Գլուխ սոխ-2 հատ
Թարմ կանաչի (մաղադանոս, համեմ, սամիթ)- կես կապ
Բրինձ- 3 ճաշի գդալ
Աղ, սեւ եւ կարմիր աղացած պղպեղ- ըստ ճաշակի
Գազար- 1 հատ
Թարմ կանաչ կամ կարմիր պղպեղ-1 հատ
Սխտոր-2 պճեղ
Կարագ կամ բուսական յուղ- 3 ճաշի գդալ
Պատրաստման եղանակը
Միսը, եթե աղացած չէ, մաքրել ջլերից, թաղանթներից եւ աղալ: Ավելացնել շատ մանր կտրատած կամ աղացած 1 հատ սոխը, կանաչին, 2 ճաշի գդալ բրինձը (ցանկալի է՝ կլոր), համեմունքները եւ 1 հավկիթ: Լավ խառնել ու ձեռքերով փոքրիկ գնդիկներ պատրաստել՝ ընկույզի կամ ծիրանի մեծության:
Կարդացեք նաև
Մինչ այդ կրակին դնել ջրով լի կաթսան: Երբ ջուրը տաքանա, բայց մինչեւ եռալը, մսագնդիկները գցեք մեջը:
Հենց սկսվի ջրի վրա հավաքվել մսի «քափը», հավաքեք այն ցանցավոր գդալով եւ թափեք:
Քանի միսը եփվում է, առանձին փոքրիկ կաթսայի կամ էմալապատ թասի մեջ պատրաստեք սոխառածը: Կարագը կամ բուսական յուղը դրեք տաքանա, ավելացրեք մանր կտրատած 1 գլուխ սոխն ու սխտորի պճեղները, քերած գազարը, թողեք մի քիչ տապակվի: Ավելացրեք նաեւ կտրատած թարմ պղպեղը: Բանջարեղենը 4-5 րոպե տապակելուց հետո ավելացրեք եռացող մսաջրին: Նույն պահին ապուրի մեջ գցեք նաեւ մնացած 1 ճաշի գդալ բրինձը:
Մոտ 10-15 րոպեից ապուրն արդեն պատրաստ կլինի: Մեկ հավկիթը լցրեք որեւէ թասիկի մեջ, լավ հարեք, եւ շատ դանդաղ ավելացրեք ապուրին՝ անընդհատ պատառաքաղով հարելով ապուրի մեջ, որպեսզի սպիտակուցը չառանձնանա եւ ձուն ամբողջովին լուծվի: Կրակն անջատեք եւ ավելացրեք մանր կտրատած թարմ կանաչի:
Մատուցեք տաք-տաք:
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ»
23.07.2016
Իսկ կարտոֆիլ չկա ապուրի մեջ?
Հարգելի Լաուրա, ոչ, այս ապուրի մեջ կարտոֆիլ չի նախատեսվում, քանի որ բրինձն արդեն իսկ բավականաչափ խտություն է հաղորդում ապուրին: Իսկ հարած ձուն` առավել եւս: Սակայն եթե ցանկանում եք` ոչինչ չի խանգարում ավելացնել նաեւ կարտոֆիլ: Բարի ախորժակ: 🙂