Դերասան Սերգեյ Դանիելյանի կարծիքով, այսօր չկա ՀՀ որեւէ քաղաքացի, որ չհամաձայնի Սասնա ծռեր խմբավորման անդամների պահանջներին:
«Ինձ թվում է՝ բոլորն են այս օրերին համաձայն զինյալ խմբի անդամների պահանջների հետ: Այլ հարց է, որ պայքարի ձեւերին են դեմ: Պետք է հասկանալ, որ ուրիշ ելք չի եղել, դրա համար են մարդիկ դիմել հենց այդ քայլին»,- Aravot.am-ին ասաց դերասանը՝ միաժամանակ պնդելով, որ «Սասնա Ծռերի» առաջ քաշած պահանջներից մեկի՝ Սերժ Սարգսյանի հրաժարականով Հայաստանում խնդիրները չեն լուծվի. «Ոչ մի բան չի լուծվի, պարզապես մարդիկ ուրիշ ելք չեն տեսնում, իսկ Սարգսյանի հեռանալը խնդիրը չէ, խնդիրը համակարգային է, իսկ ով է փոխելու համակարգը, ես չգիտեմ, չեմ տեսնում փոխողին»:
Նրա համար միեւնույնն է՝ ովքեր են Հայաստանում փոփոխություններ իրականացնելու նախաձեռնություն ստանձնած խմբավորման անդամները՝ ազատամարտիկնե՞ր, թե՞ Բարսելոնայից եկած մերսող. «Ի՞նչ կապ ունի այդ մարդը մերսող է աշխատել, թե՞՝ խոհարար, մարդը եկել է, հուսամ՝ անկեղծ զգացմունքներով, եկել ու մասնակցում է այդ գործընթացին: Այն, որ խմբում երկու հոգի են ազատամարտիկ, իսկ մնացածը ՝ ոչ, իսկ ինչ է, եթե ազատամարտիկ չէ, մարդ չէ՞: Չի՞ կարող գործողություն անել:
Ես մի բան չեմ կարողանում հասկանալ, ինչպես մեր ԱԱԾ-ն չկարողացավ նախապես իմանալ նրանց գործողությունների մասին, կամ իսկապես վատ են աշխատում, կամ…»:
Կարդացեք նաև
Սերգեյ Դանիելյանը իշխանություններից մի բան է ակնկալում. «Որ այնքան բութ չեն գտնվի ու կգնան բանակցությունների: Ինչ նոր բան փոխվելու է, բայց ինչպես՝ չգիտեմ: Ամեն դեպքում, սա իշխանությունների համար լավ սթրես էր: Հասկացան՝ ոչ ոք Աստված չէ, ամեն ինչ էլ կարող է պատահել: Չնայած հոկտեմբերի 27-ին էլ պետք է հասկացած լինեին, Վազգեն Սարգսյանն էլ էր ասում՝ մեզ խփող չկա, մենք նենց տղերք ենք, որ մեզ ոչ մի բան չեն կարող անել: Բայց եթե Հուլիոս Կեսարին արեցին, Վազգենն ով էր, որ չանեին: Պատմությունն ամեն անգամ կրկնվում է, մարդիկ էշի նման գնում են առաջ: Ոչ մի լավ բան չեմ ակնկալում, եթե նույնիսկ Սերժ Սարգսյանը փոխվեց, չունեն այն համակարգը, որ կկարողանա այս ամենը շտկել»:
Արփինե ՍԻՄՈՆՅԱՆ
ԼԻՈՎԻՆ ՀԱՄԱՁԱՅՆ ԵՄ…