Արդեն 10 օր է՝ «Սասնա ծռերը» իր վերահսկողության տակ է պահում ոստիկանության ՊՊԾ գունդը: Այս գիշեր եւս ցուցարարները բողոքի երթ են իրականացրել: Իշխող վարչախմբի հասցեին նրանք ինչ-ինչ արտահայտություններ են անում, նաեւ վանկարկում են «Ոստիկան, միացիր», «Պավլիկ», «Սերժիկ, հեռացիր»:
Ոմանք երթին մասնակցում են փոքր երեխաների հետ: Ավտոմեքենաներով քաղաքացիները նրանց արձագանքում են բարձր ազդանշաններով:
Հիմնադիր խորհրդարանի անդամ Ալեք Ենիգոմշյանը դիմեց ոստիկաններին. «Ես կես ժամ առաջ ուղիղ եթերով պահանջել եմ, որ կապ հաստատվի ներսում գտնվող տղաների հետ, որպեսզի համոզվենք, որ ամեն ինչ նորմալ է»:
Նախկին Գերագույն խորհրդի պատգամավոր Ալբերտ Բաղդասարյանն էլ ոստիկաններին կոչ արեց, որ իրենց ղեկավարությանը փոխանցեն, որ մոտենան ժողովրդին: Ալեք Ենիգոմշյանը կրկին պնդեց. «Եթե հանրապետության ներկա վարչախմբի ղեկավարները մտահոգ են կայունությամբ՝ մեր պահանջը ներսում գտնվողներից մեկ զանգ ստանալն է: Եթե այդ պարզ պահանջին չեն արձագանքում, նշանակում է Հայաստան երկիրը տանում են քաոս»:
Կարդացեք նաև
«Ունեք մի քանի րոպե, այլապես մենք կգնանք կապ հաստատելու: Էս արյունահեղությունը չենք ուզում, միշտ անհասկացության պատ է դրվում, ու Սարոյան եղբայրներ ենք դառնում,- շեշտեց Ալբերտ Բաղդասարյանը ու հավելեց,- մենք ոչ մի կոնֆլիկտ չենք ուզում, ի վերջո, իմ բարեկամներն էլ են ոստիկան, գուցե ձեր բարեկամներն էլ այստեղ են»:
Նա հետաքրքրվեց, թե ինչ կրակոցներ են եղել ներսում: Ոստիկանն ասաց, որ տեղյակ չէ, քանի որ միասին են քայլել երթի ժամանակ: Ցուցարարներն ալեկոծված էին, կազմակերպիչները նրանց հանգստացնում էին: Բաղդասարյանն ասաց, որ մի քանի հոգի երկիրը պահելու համար շարքային ոստիկաններին թշնամացրել են շարքային քաղաքացիների հետ, նա պահանջեց կապ ապահովել ներսում գտնվողների հետ: «Մենք անվերջ խոսելու եւ անվերջ սպասելու ժամանակ չունենք»,-ասաց նա:
«Եթե երկու րոպեից զանգ չստանամ՝ անձամբ ուղղվելու եմ դեպի ՊՊԾ գունդ»,-ասաց Ալեք Ենիգոմշյանը ու շարժվեց Քրիստափորի փողոց: Այս պահին դեռ անորոշ վիճակ է:
Գոհար ՀԱԿՈԲՅԱՆ
