Հուլիսի 26-ին ՀՀ վարչապետ Հովիկ Աբրահամյանն այցելել է Տավուշի մարզ: Վարչապետին ուղեկցում էին ՀՀ տարածքային կառավարման եւ զարգացման նախարար Դավիթ Լոքյանը, գյուղատնտեսության նախարար Սերգո Կարապետյանը, Տավուշի մարզպետ Հովիկ Աբովյանը:
Հ. Աբրահամյանը այցելել է Իջեւան քաղաքի Սայաթ-Նովա փողոցում գտնվող Դավիթ Սահակյանի առանձնատուն: Դ. Սահակյանը անչափահաս 6 տղա ունի: Նրա բազմազավակ ընտանիքը Տավուշի մարզի թիվ 41 ընտրատարածքից ԱԺ պատգամավոր Հակոբ Հակոբյանի նվիրաբերած 12 500 դոլարի եւ կառավարության հատկացրած նույնքան գումարի շնորհիվ ձեռք է բերել սեփական առանձնատուն:
Վարչապետի եւ նրան ուղեկցող պաշտոնյաների հետ այսօր Սահակյանների տուն է այցելել նաեւ պատգամավոր Հակոբ Հակոբյանը: Դավիթ Սահակյանն ասաց, որ շնորհակալ է պատգամավորի եւ վարչապետի վերաբերմունքից: Դավիթը վարչապետի մոտ բարձրացրել է իրենց փողոցի բարեկարգման խնդիրը:
Այնուհետեւ Հ. Աբրահամյանը այցելել է Ազատամուտ գյուղ, ուր ծանոթացել է մանկապարտեզի շինարարության ընթացքին:
Կարդացեք նաև
Վարչապետի այցելության հաջորդ վայրը սահմանամերձ Բաղանիս գյուղն էր, որ գյուղական տարածքների տնտեսական զարգացման ծրագրերի իրականացման գրասենյակը 263 միլիոն դրամով խմելու ջրագիծ է կառուցել: Բաղանիս համայնքը ծրագրի արժեքի 10 տոկոսի չափով պահանջվող ներդրում չէր կարող ապահովել, համայնքի փոխարեն այդ գումարը, որպես բարեգործություն, ներդրել է «Վարդանյաններ» հիմնադրամը: Կառուցվել են 200 եւ 50 տոննա տարողությամբ օրվա կարգավորիչ ջրամբարներ, 16 կմ երկարությամբ ջրագիծ, ջրահավաք ավազանը նորոգվել է, տեղադրվել են ջրաչափեր: Բաղանիս համայնքի ղեկավար Նարեկ Սահակյանը հայտնեց, որ դրա արդյունքում Բաղանիսը շուրջօրյա ջրամատակարարում կունենա:
Բաղանիսում վարչապետին դիմավորեցին ավանդական աղուհացով: Նարեկ Սահակյանը վարչապետին ներկայացրեց գյուղում իրականացվող ծրագրերը, վարչապետը զրուցեց բաղանիսցիների հետ:
Նախատեսվում էր, որ վարչապետը կայցելի Զորական գյուղ, ուր ապրիլյան պատերազմի ժամանակ զոհված 19-ամյա Գարիկ Մովսիսյանի ընտանիքի համար տուն է կառուցվում: Բնակարանային ծանր պայմաններում ապրող Մովսիսյանների ընտանիքին այդ հարցով օգնելու խոստում Հովիկ Աբրահամյանը տվել է Զորական մայիսի 4-ի այցի ժամանակ:
Վարչապետն ու նրան ուղեկցող պաշտոնյաները կայցելեն նաեւ Այրումի «Միրգ» պահածոների ձեռնարկություն, կծանոթանան Պտղավան գյուղում ընկուզենու այգիներ հիմնելու գործընթացին:
Ոսկան ՍԱՐԳՍՅԱՆ
