ՀՀԿ գործադիր մարմնի անդամ, ԱԺ ֆինանսավարկային եւ բյուջետային հարցերի
մշտական հանձնաժողովի նախագահ Գագիկ Մինասյանը իշխող Հանրապետական կուսակցության այն եզակի անդամներից է, ով այս օրերին համաձայնեց մի քանի հարցի պատասխանել:
– Պարոն Մինասյան, արդեն 13-14 օր այս իրավիճակը հանրապետությունում ձգվում է, հանգուցալուծումը կարծես չի երեւում: Տարբեր առաջարկներ եղան՝ քաղբանտարկյալներին, ամսի 17-ից սկսած բոլոր կալանավորվածներին ազատ արձակելու, հակակոռուպցիոն ինչ-որ քայլերով ցույց տալու, որ վստահության մթնոլորտ կա եւ առաջ շարժվելու: Իշխանությունը կարծես ոչինչ չի անում: Ինչո՞ւ:
– Չեմ կարծում, որ հիմա ճիշտ է, որ մենք այս հարցերը քննարկենք՝ այն պարզ պատճառով, որ այս միջադեպերի հենց առաջին օրվանից ես Հայաստանում չեմ եղել: Բայց դուք, կարծում եմ, կարդացել եք տիկին Նաղդալյանի եզրափակիչ խոսքը ՀՀԿ գործադիր մարմնի երեկվա նիստից հետո: Կարծում եմ՝ մոտեցումն այսպիսին է, որ հիմա որեւէ ելույթով, որեւէ հայտարարությամբ չարժե վնասել այն փխրուն իրավիճակը, որը կարծես թե ձեւավորված է, որը տանում է խնդրի, ամենակարեւորը՝ առանց զոհերի հանգուցալուծման:
– Համենայնդեպս, չի երեւում, որ կողմերը զիջումների պատրաստ են: Ինչ-որ պատային իրավիճակ է…
Կարդացեք նաև
– Այ, այդ հարցը, որը հիմա դուք տալիս եք, հենց այն հարցն է, որը ոչ մի դեպքում տալ չի կարելի:
– Ինչո՞ւ:
– Չի կարելի էդպիսի բան ասել: Որովհետեւ դուք փաստորեն նեգատիվ էմոցիաներ եք տարածում: Ես ասացի՝ տիկին Նաղդալյանն ասում էր, եւ ես դրա հետ համաձայն եմ, որ հիմա մենք բոլորս պետք է այնպես անենք, որ գտնվի մի լուծում, որ չբերի նոր զոհերի: Իսկ դուք (ծիծաղում է-Ն. Գ.) ճիշտ հակառակն եք ձեր հարցադրմամբ անում:
– Դուք անձամբ ի՞նչ լուծում եք պատկերացնում:
– Ես պատկերացնում եմ այն լուծումը, որը առաջին հերթին չի բերի նոր զոհերի:
– ՀՀԿ-ական գործիչներն ինչո՞ւ են այս օրերի ընթացքում խուսափում խոսել կատարվածի մասին: Ինչո՞ւ չեն…
– Ես ՀՀԿ-ական գործիչների մասին չեմ կարող ասել, բայց ես կարող եմ ձեզ երրորդ անգամ ասել այն, ինչ ասաց երեկ տիկին Նաղդալյանը՝ այսօր մեր հայտարարություններով մենք չպետք է վնասենք այն գործընթացին, որը հետեւողական տարվում է իշխանությունների կողմից՝ նպատակ ունենալով այլեւս որեւէ զոհ չթույլատրել:
– Իր ելույթում հանրապետության նախագահն ասաց, որ պատճառների մասին հիմա չի ուզում խոսել, հիմա դրա ժամանակը չէ: Դա քննարկումների, շահարկումների տեղիք տվեց…
– Ես կարծում եմ՝ դա հենց այն ճիշտ մոտեցումն էր, որը պետք է հենց այդ ժամանակ ասվեր: Հիմա մենք բոլորս պետք է մի գերխնդիր ունենանք՝ այս իրավիճակը հանգուցալուծել այնպես, որպեսզի որեւէ նոր զոհ չլինի: Ամեն ինչի ժամանակը կգա:
– Պատճառներին, կարծում եք, ճի՞շտ է հետո անդրադառնալ:
– Միանշանակ:
– Նախագահը նաեւ ասաց, որ հետեւություններ պիտի անենք այս ամենից: Այդ հետեւություններն արդեն արվե՞լ են: Որո՞նք են, եթե արվել են:
– Ես կարծում եմ՝ այս ամենի հետ կապված ամեն հարց, այդ թվում նաեւ հետեւությունները, կարվեն այն ժամանակ, երբ որ մեզ հաջողվի լուծել այն հիմնական խնդիրը, որն այսօր ծառացած է մեր բոլորի, այդ թվում նաեւ՝ նախագահի, ՀՀԿ-ի, ձեր՝ որպես չորրորդ իշխանության ներկայացուցչի, առաջ: Որը, պիտի ասեմ, ես այնքան ցայտուն չեմ տեսնում ձեր պահվածքում՝ անել այնպես, որպեսզի այլեւս ոչ մի զոհ չլինի:
– Այսինքն՝ Դուք մեղադրո՞ւմ եք չորրորդ իշխանությանը կրքեր բորբոքելու…
– Ես նման բան չասացի:
– Ասացիք՝ ցայտուն չեք տեսնում մեր պահվածքում…
– Այո, ես կուզենայի, որ ավելի ցայտուն լիներ դա:
– Այս օրերին շատ շրջանառվեց տեսակետը, որ Հայաստանը, փաստորեն, երկու կարեւորագույն օղակներով՝ պաշտպանության, բանակի եւ ոստիկանության մասով, բավական լուրջ վտանգված է թերությունների ու բացերի առումով: Համենայնդեպս, ապրիլյան քառօրյա պատերազմն ու ՊՊԾ գնդի գրավման այս վերջին դեպքերը դա են փաստում: Համամի՞տ եք:
– Ես ասում եմ՝ բոլոր բնագավառներում առավելության կամ ավելի մեծ հաջողությունների հասնելու ճանապարհն անսպառ է: Եվ այդ բոլոր բնագավառներում մենք անելիքներ ունենք: Եվ այդ բոլոր բնագավառներում մենք պետք է լուրջ ջանքեր ներդնենք: Բոլոր: Անխտիր՝ բոլոր, որպեսզի հասնենք ավելի բարձր արդյունքների:
Երբ ասացի, որ միակ՝ ամենավերջին հարցն էլ եմ ուզում տալ, պարոն Մինասյանն ասաց. «Ես միակ հարցը ձեզ տալու իրավունք ունե՞մ»: «Անպայման»,- իմ պատասխանից հետո, զրուցակիցս ասաց. «Իմ հարցն այսպիսին է՝ եթե որեւէ բառ, այդ թվում մեր անձնական խոսակցությունը, չի հրապարակվելու, ապա դա մեր վերջին հարցազրույցն է: Համաձա՞յն եք»: «Չէ, չէ, ամբողջությամբ հրապարակվելու է»,- խոստացա ու ինչին համապատասխան էլ զրույցը հրապարակում ենք առանց խմբագրումների: Տվեցի ամենավերջին հարցը.
– Այս իրավիճակի հանգուցալուծումից հետո կառավարությունում փոփոխություններ կլինե՞ն՝ կարծում եք:
– Ես չեմ կարծում, որ այդ հարցը հիմա տալը կոռեկտ է եւ ճիշտ է: Որովհետեւ մենք պետք է այսօր մտածենք մի գերխնդրի մասին: Գերխնդիր, որն այսօր ինչքան էլ դժվարություն մեր առջեւ ծառացրած լինի, մենք հաջողել ենք իրականացնել՝ մեծ դժվարություններով, մեծ խոչընդոտներ հաղթահարելով: Դա որեւէ նոր զոհ չտալն է: Եվ ասեմ, եթե դուք կարդաք մամուլը, նաեւ արտասահմանյան, կտեսնեք, որ շատերն ուղղակի դրական զարմանք են ապրում, թե ինչպե՞ս է դա հաջողվում Հայաստանում:
Զրույցը՝
ՆԵԼԼԻ ԳՐԻԳՈՐՅԱՆԻ
Հ.Գ. Հարցազրույցն արվել է մինչեւ երեկոյան Խորենացի փողոցում տեղի ունեցած դեպքերը:
«Առավոտ»
30.07.2016
