«Սասնա ծռեր» խմբի անդամներին սնունդ հասցրած Արթուր Սարգսյանի մեղադրանքը վերաորակվել է: Նախկինում նրան մեղսագրվում էր նույն խմբի կազմում, նույն գործողությունները կատարելը, հիմա մեղսագրվում է օժանդակություն «Սասնա ծռերին»: Այդ մասին Aravot.am-ի հետ զրույցում ասաց Արթուր Սարգսյանի պաշտպաններից Տիգրան Եգորյանը:
«Սասնա ծռերի» անդամներին, այդ թվում նաեւ Արթուր Սարգսյանին, առաջադրվել էր մեղադրանք՝ ՀՀ Քր.օր.-ի 218 հոդվածի 3-րդ մասի 1-ին կետով (պատանդ վերցնելը) եւ 235 հոդվածի 3-րդ մասով (ապօրինի զենք-զինամթերք ձեռք բերել, իրացնել, պահել, փոխադրել):
Հիշեցնենք, Արթուր Սարգսյանը հուլիսի 26-ին, սննդով բեռնված մեքենայով ճեղքել էր ոստիկանության պատը եւ սնունդ հասցրել ՊՊԾ գունդը գրաված «Սասնա ծռերի» անդամներին:
Կարդացեք նաև
Հարցին` օժանդակության մեղադրանքն ավելի թեթեւացնում է Արթուրի վիճակը, փաստաբանն ասաց. «Սանկցիաները նույնն են: Բայց դե, դա օժանդակություն է, բնականաբար, պատիժը կատարողից ավելի քիչ է: Բայց դա արդեն դատական ակտով լուծման ենթակա հարց է: Մենք հիմա պետք է պայքարենք, որ խափանման միջոցը փոխվի: Քննչական մարմնի կողմից առայժմ նման նախաձեռնություն չկա»:
Նելլի ԳՐԻԳՈՐՅԱՆ
