Արցախի «Ազգային վերածնունդ» կուսակցության անդամ, քաղաքագետ Տիգրան Գրիգորյանը չի շտապում գնահատականներ տալ Արցախի սահմանադրական փոփոխությունների հայեցակարգին:
«Մինչեւ նախագահի հրապարակումը դեռ պարզ չէ՝ ինչ է լինելու, բայց ակնհայտ է, որ այս սահմանադրական փոփոխությունները արհեստական օրակարգ են ներկայացնում, այդ փոփոխությունների որեւէ անհրաժեշտություն չկա, ու իշխանության տարբեր խմբերի շահերը սպասարկելու համար է այս ամենը կատարվում: Մեր քաղաքական ուժի դիրքորոշումն այն է, որ տասը տարին մեկ Սահմանադրություն չեն փոխում, նույնիսկ եթե ինչ-որ բարի նպատակով փոխելիս լինեն, դեմ կլինենք, որովհետեւ մենք կարծում ենք՝ Արցախի զարգացման համար կարեւորը ոչ թե տասը տարին մեկ կառավարման մոդելը փոխելն է, այլ ինստիտուտների կայացումն է: Իսկ ինստիտուտները չեն կարող կայանալ, եթե տասը տարին մեկ խաղի կանոնները փոխվում են»,-Aravot.am-ին ասաց Տիգրան Գրիգորյանը:
Նա հայեցակարգից դրույթներ չցանկացավ առանձնացնել ու դրանց վերաբերյալ իր գնահատականն ասել. «Սխալ է ուրեւէ գնահատականներ տալը, սպասենք նախագծի հրապարակմանը: Հայեցակարգից պարզ էր, որ անցում ենք կատարելու այլ կառավարման մոդելի, այսինքն հնարավոր է, որ վարչապետի պաշտոնն էլ վերացվելու է, նախագահը դառնալու է գործադիր իշխանության միակ ղեկավարը: Իշխանություններն այդ քայլն արդարացնում են նրանով, որ փորձում են օպտիմիզացիայի ենթարկել կառավարման համակարգը, իսկ մենք մտածում ենք, որ այդ օպտիմիզացիան հնարավոր է կատարել առանց սահմանադրական փոփոխությունների»:
Կարդացեք նաև
Արփինե ՍԻՄՈՆՅԱՆ
