Անազատության մեջ գտնվող Անդրիաս Ղուկասյանը նախօրեին կրկին հարցաքննվել է իր գործով վկա Գեղամ Սահակյանի հետ: Այս մասին Aravot.am-ին ասաց Անդրիաս Ղուկասյանի պաշտպան՝ փաստաբան Կարեն Մեժլումյանը:
Նրա խոսքով, Գեղամ Սահակյանը վեց ամիս ստացիոնար բուժում է ստացել իր հիվանդության համար, հետևաբար վերջինիս ցուցմունքը կամ հիվանդության արդյունք է, կամ ուղղորդված սուտ:
Հիշեցնենք, որ փաստաբանը, վկայակոչելով Դատալեքսում տեղադրված դատարանի որոշումը, ասել էր՝ Սահակյանը տառապում է «Անձի պարանոիկ խանգարում» հոգեկան հիվանդությամբ, որի ախտանիշներից են ի թիվս այլնի` փաստերի աղավաղման ընդհանուր միտում՝ այլ մարդկանց գործողությունները ոչ ճիշտ մեկնաբանելով և անձի իրավունքների հետ կապված հարցերում ոչ ադեկվատ վերաբերմունք:
«Զանգվածային անկարգությունների գործը, որը հարուցվել էր Անդրիաս Ղուկասյանի, Արմեն Մարտիրոսյանի, Դավիթ Սանասարյանի նկատմամբ, տապալված գործ է, օբյեկտիվ ապացույցներով՝ տեսագրություններով, վկաների ցուցմունքներով, ամբողջությամբ հերքվել է: Այս պայմաններում գտել են այդ վկային, որն ասում է՝ գիտեք, Անդրիասն ինձ ասել է, որ ժողովրդի հետ պետք է գնամ Սարի թաղով, իջնեմ ՊՊԾ գունդը գրավեմ ու դետալներ է ներկայացնում, որոնք հերքող ապացույցներ ենք ներկայացրել: Անդրիասն ասում է՝ երբեւէ նրան չի զանգել, Գեղամ Սահակյանն է իրեն զանգել:
Կարդացեք նաև
Անդրիասի խոսքով, վերջին վեց ամսում Գեղամն էլ իրեն չի զանգել, հանկարծ «Սասնա ծռերի» գործը հենց լինում է, սա հայտնվում է, զանգում է, թե հանդիպենք, հիմա էլ պատմում է, թե այդ հանդիպման ժամանակ Անդրիասն ասաց՝ գնամ ՊՊԾ գունդը գրավեմ: Վարույթ իրականացնող մարմինն էլ Գեղամ Սահակյանի ցուցմունքի հիման վրա, Անդրիաս Ղուկասյանի գործը միացրեց «Սասնա ծռերի» գործին»,- ասաց պարոն Մեժլումյանը:
Նշենք, որ վաղը դատարանը կքննի քննիչի միջնորդությունը Անդրիաս Ղուկասյանի կալանքը՝ որպես խափանման միջոց, եւս երկու ամսով երկարաձգելու վերաբերյալ:
Արփինե ՍԻՄՈՆՅԱՆ
իսկ, պարոն փաստաբան, դուք վստա՞հ էք որ ձեր հաճախորդը չունի հոգեկան խնդիրներ
մէկը որ գրեթէ ինքնասպան եղաւ, բացահայտօրէն սկիզբից ձախողության մատնված, երկարատեվ հացադուլով մը
մի հատ հոգեբուժական ստուգում կատարեցէք
արդյունքը կարող է ձեր օրինական պաշտնապողականի ամենահաջող կէտը հանդիսանալ