Այսօր Վարչական դատարանը հետաձգեց ոստիկանությունն ընդդեմ քաղաքացիական ակտիվիստների` Գեղեցիկ Տոնոյանի եւ Նաիրա Բադալյանի գործերով քննությունը:
Ոստիկանությունը պահանջում է Նաիրա Բադալյանին, Գեղեցիկ Տոնոյանին վարչական պատասխանատվության ենթարկել ՀՀ Վարչական իրավախախտումների վերաբերյալ օրենսգրքի 180.1 հոդվածի (Հավաքներ անցկացնելու` օրենքով սահմանված կարգը խախտելը) 11-րդ և 15-րդ կետերի պահանջներով:
Հիշեցնենք, որ ի պաշտպանություն անազատության մեջ գտնվող Գեւորգ Սաֆարյանի` Նաիրա Բադալյանն ու Գեղեցիկ Տոնոյանը խաղաղ ակցիայի ժամանակ պառկելով Մաշտոցի պողոտայի երթևեկելի հատվածում և շղթայի միջոցով իրենց ամրացնելով ասֆալտին, փակել էին փողոցը: Ինչից հետո բերման էին ենթարկվել և տեղափոխվել ՀՀ Ոստիկանության Երևան քաղաքի վարչության Կենտրոնականի բաժին, որտեղ նրանց նկատմամբ իրականացվել էր վարչական վարույթ՝ հավաքի մասնակցի կողմից իր պարտականությունները չկատարելու ու հավաքի խաղաղ և բնականոն ընթացքի ապահովման վերաբերյալ ոստիկանության` օրենքով սահմանված պահանջները չկատարելու հիմքով: Այս երկու կանանց գործերը քննվում են առանձին, բայց նույն պատճառով այսօր հետաձգվեցին:
Քաղաքացիների ներկայացուցիչ ՀՔԱ Վանաձորի գրասենյակի իրավաբան Տաթեւիկ Սիրադեղյանը հակընդդեմ հայց է ներկայացրել` պահանջելով ոչ իրավաչափ ճանաչել ոստիկանների գործողությունները, իսկ դատարանն այդ հայցի վերաբերյալ դեռ որոշում չի կայացրել: Դատական նիստի մասին կողմերը կծանուցվեն լրացուցիչ:
Կարդացեք նաև
Արփինե ՍԻՄՈՆՅԱՆ
