Դեկտեմբերի 5-ին Նոյեմբերյանի տարածաշրջանի սահմանամերձ Ոսկեպար եւ Բարեկամավան համայնքների նախկին ղեկավարներ Երվանդ Եգանյանը եւ Գարիկ Աբազյանը դիմում են ներկայացրել ՀՀԿ-ից դուրս գալու մասին: Նախկինում հայտնել ենք, որ Գարիկ Աբազյանը հանձնել է ՀՀԿ իր անդամատոմսը:
30-ամյա Երվանդ Եգանյանը, որը Ոսկեպարը համայնքը ղեկավարել է 2012-2016թթ. հայտնեց, որ պատրաստ է միշտ սատարելու պաշտպանության նախկին նախարար Սեյրան Օհանյանին, իսկ եթե վերջինիս ղեկավարած կուսակցությունն ընդդիմադիր լինի, ավելի լավ: Նա ասաց, որ իր գյուղապետ աշխատած տարիներին համապետական ընտրություններում ՀՀԿ-ն Ոսկեպարում միշտ շատ քվեներ է ստացել:
Այժմ գործազուրկ Ե. Եգանյանի վկայությամբ՝ 2016թ. սեպտեմբերի 18-ին կայացած խոշորացված Նոյեմբերյան համայնքի ղեկավարի ընտրություններից առաջ տարածքային կառավարման եւ զարգացման նախարար Դավիթ Լոքյանը եւ նրա առաջին տեղակալ Վաչե Տերտերյանը բնակչության առաջ վստահեցրել են, որ ՏԻՄ ընտրություններից հետո նախկին գյուղապետերը կաշխատեն որպես խոշորացված համայնքի ղեկավարի լիազոր ներկայացուցիչներ, սակայն այդպես չեղավ:
Ե. Եգանյանը չգիտի, թե երբ է կայանալու «Երրորդ հանրապետություն» կուսակցության համագումարը: Նա ասաց, որ պաշտպանության նախկին նախարար Ս. Օհանյանը Ոսկեպարին օգնել է սահմանամերձ Ոսկեպարում նախադպրոցական հաստատություն գործարկել, աջակցել է գյուղի հաշմանդամ ազատամարտիկներին, սատարել Ոսկեպարում բիլիարդի, սեղանի թենիսի խաղադաշտեր ունենալու եւ այլ հարցերում:
Կարդացեք նաև
Ոսկան ՍԱՐԳՍՅԱՆ