Սոցցանցերում քննարկման թեմա դարձած Երեւանի Սուրբ Աստվածածին(Կաթողիկե) եկեղեցու ապակե դուռը ժամանակավոր լուծում է: Այս մասին Aravot.am-ին հայտնեց Արարատյան հայրապետական թեմի տեղեկատվական բաժնի համակարգող Տեր Եսայի քահանա Արթենյանը:
«Ինչ-որ կերպ պետք էր ժամանակավոր փակել այդ հատվածը: Դա ժամանակավոր լուծում է: Մայր Աթոռի ճարտարապետների խորհուրդը վերջնական որոշում կկայացնի, թե ինչ դուռ պետք է լինի»,-մեզ հետ զրույցում ասաց Տեր Եսային:
Հետաքրքրվեցինք նաեւ նախկին դռան ճակատագրից: «Նախկին՝ փայտյա դուռն ինքնաշեն է եղել: Երբ առաջին անգամ 90-ականների վերջին Կաթողիկեում հոգեւորական նշանակվեց ծառայության, հավատացյալները բերեցին սովորական փայտե դուռ դրեցին, որ հատկապես ձմռանը հնարավոր լինի եկեղեցին տաքացնել եւ արարողություններ իրականացնել: Դա հենց եկեղեցու դուռը չի եղել, այլ «սիրողական» պատրաստված դուռ»,-պարզաբանեց Տեր Եսային:
Լուիզա ՍՈՒՔԻԱՍՅԱՆ
