«Նաիրիտը» փրկելու եւ վերագործարկման պահանջով այսօր տասնյակի հասնող նաիրիտցիներ հավաքվել էին կառավարության շենքի մոտ:
«Նաիրիտի» համակարգող խմբի անդամ Կարինե Շահվերդյանի խոսքով, իրենք առնվազն շաբաթը մեկ հավաքվում են՝ հիշեցնելու, որ թույլ չեն տա լուծարել «Նաիրիտը»
Հիշեցնենք, որ 2016 թվականի նոյեմբերի 28-ին Երևանի Շենգավիթ վարչական շրջանի ընդհանուր իրավասության դատարանը բավարարել է «Հայաստանի էլեկտրական ցանցեր» (ՀԷՑ) ընկերության հայցը և «Նաիրիտ» գործարանը սնանկ ճանաչել։
«Վերջերս էներգետիկ ենթակառուցվածքների և բնական պաշարների նախարարության կայքում տեղադրվեց հայտարարություն, ըստ որի՝ հայտարարվում է մրցույթ՝ նպատակ ունենալով «Նաիրիտ» գործարանի արտադրական ենթակառուցվածքների վերագործարկման նպատակով ներգրավել մասնավոր գործընկեր, և հրավիրվում է համապատասխան կազմակերպություններին ներկայացնելու հետաքրքրության հայտ:
Կարդացեք նաև
Եվ վերջին ամիսներին ասպարեզում են «Նաիրիտում» ներդրումներ իրականացնելու պատրաստակամությամբ հանդես եկող կազմակերպություններ, սակայն «Նաիրիտի» սնանկության վճիռը փաստացի արգելք կհանդիսանա այդ ընկերությունների համար, և «Նաիրիտը» վերջնականապես կգնա լուծարման ճանապարհով։ Ստացվում է՝ մրցույթի ավարտից ընդամենը մեկ ամիս շուտ գործարանը սնանկ ճանաչելու արագացված որոշմամբ, «Նաիրիտը» կարող է զրկվել երբևիցե վերագործարկվելու հնարավորությունից»,- Aravot.am-ին ասաց տիկին Շահվերդյանը:
Ըստ նրա, «Նաիրիտի» սնանկության վերաբերյալ դատական նիստ է նախատեսված փետրվարի տասնչորսին. «Կարծում եմ՝ մինչեւ այդ առողջացման ծրագիր էլ կլինի, ինչը մինչեւ այս պահը դեռ չի երեւում, դեռ ոչ մեկի կողմից չի ներկայացվել: Բայց ես կարծում եմ՝ մինչեւ դատական նիստը երեւի կընդունվի, կտեսնենք՝ ինչ որոշում կկայացնեն»:
Արփինե ՍԻՄՈՆՅԱՆ
