Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստում ելույթով հանդես եկավ, այնուհետև պատվիրակների հարցերին պատասխանեց ԵԽ գլխավոր քարտուղար Թյորբորն Յագլանդը:
Ադրբեջանի պատվիրակ Ռաֆայել Հուսեյնովը բարձրացրեց դեկտեմբերի 29-ին զոհված ադրբեջանցի սպայի հարցը` իր խոսքերով իբր նա հայկական կողմի վայրագությունների զոհ է դարձել: ԵԽ գլխավոր քարտուղարին նա հարցրեց` ԵԽ-ն ի՞նչ լծակներ կարող է կիրառել հայկական կողմին պատասխանատվության ենթարկելու հարցում:
Թյորբորն Յագլանդը պատասխանեց մոտավորապես այն ոճով, ինչ ոճով շաբաթներ առաջ այս հարցի վերաբերյալ հայտարարություն էր տարածել, որում իր մտահոգությունն էր հայտնել Հայաստանի և Ադրբեջանի սահմանին տեղի ունեցած միջադեպի վերաբերյալ:
Հիշեցնենք, որ դեկտեմբերի 29-ին Տավուշի մարզի Չինարի գյուղի մոտ ադրբեջանական ուժերը ձեռնարկել էին դիվերսիոն ներթափանցման փորձ, ինչի հետևանքով զոհվել էր 3 հայ զինվոր: Ադրբեջանական կողմը, ըստ ՀՀ ՊՆ-ի, ունեցել էր 7 զոհ, ընդ որում զոհերից մեկի մարմինը մնացել է Հայաստանի տարածքում:
Կարդացեք նաև
Մինչդեռ ԵԽԽՎ ամբիոնից պարոն Յագլանդն, ըստ էության, քննադատությունն ուղղեց դեպի հայկական կողմ` հայտարարելով, թե կոչ է անում կողմերին հարգել հրադադարի ռեժիմը` հաշվի առնելով հարցի մարդասիրական բնույթը: Այնուհետև հավելեց. «Ես սա հիմա հայտարարում եմ, քանի որ այս մասին դեռ երկու տարի առաջ ասել եմ ՀՀ նախագահին»:
Տաթև ՀԱՐՈՒԹՅՈՒՆՅԱՆ
