Սուրբ Սարգսի եւ երիտասարդների օրհնության օրը այս տարի կնշվի փետրվարի 11-ին: Տոնը շարժական է եւ ամեն տարի հունվարի վերջից մինչեւ փետրվարի 20-ը: Այս մասին այսօր լրագրողների հետ հանդիպման ժամանակ ասաց Արարատյան Հայրապետական թեմի առաջնորդանիստ Սուրբ Սարգիս եկեղեցու եւ երիտասարդական կառույցների հոգեւոր հովիվ Տեր Պետրոս ավագ քահանա Մալյանը:
Տեր հայրը ներկայացնելով սուրբ Սարգիսի կյանքի եւ վարքի մասին՝ հավելեց նաեւ, որ տոնի առավոտյան սրբի մասունքակիր աջը Մայր Աթոռ Սուրբ Էջմիածնից կբերվի առաջնորդանիստ Սուրբ Սարգիս եկեղեցի: Մատենադարանից կբերվի նաեւ 17-րդ դարում՝ Սուրբ Սարգիս եկեղեցում գրված ձեռագրերից մեկը: Այդ սրբությունները մինչեւ երեկոյան ժամերգությունը կմնան եկեղեցում՝ հնարավորություն տալով հավատավոր ժողովրդին հաղորդվել այդ սրբությունների հետ:
«Հաշվի առնելով, որ Սուրբ Սարգիսը զորավար է եղել, արդեն 2 տարի է զինվորներին պարգեւատրում ենք անում: Այդ օրվա պատարագին կմասնակցեն նաեւ ՀՀ նախագահը, պաշտպանության նախարարը եւ 20 զինվորներ, որոնց ցանկը տրամադրել է պաշտպանության նախարարությունը: Զինվորներ, որոնք դեռ ծառայում են առաջնագծոււմ, աչքի են ընկել իրենց սխրանքներով, քաջագործություններով»,-ասաց Տեր Պետրոս ավագ քահանա Մալյանը:
Նրա խոսքերով՝ այս տարի էլ Արարատյան թեմը տոնի նվիրված քայլերթ է կազմակերպել փետրվարի 11-ին, ժամը 14:00. «Սուրբ Սարգիս եկեղեցուց խաչի թափորը կշարժվի Մաշտոցի պողոտայով մինչեւ Սիրահարների այգի, որտեղ կավարտվի համերգային ծրագրով: Տոնը սկսելու ենք ամսի 10-ից՝ երեկոյան Կարապի լճի մոտ կայանալիք համերգային ծրագրով, որտեղ կերպավորված Սուրբ Սարգիսը կբաժանի նաեւ տոնի մաս կազմող աղի բլիթներ»:
Կարդացեք նաև
Ի դեպ Տեր Պետրոս ավագ քահանա Մալյանը մեզ հետ զրույցում նշեց, որ պատրաստվելու են նաեւ քաղցր բլիթներ, որպեսզի պահպանվի դարերով եկած բլիթի ժողովրդական սովորությունը:
Հայաստանի պետական ֆիլհարմոնիայի տնօրեն, ՀՀ մշակույթի վաստակավոր գործիչ Գագիկ Մանասյանն էլ նշեց , որ տոնը ոչ միայն եկեղեցական է, այլեւ ժողովրդական ծիսակատարություն, ուստի խնդիր կա, որ հնարավորին չափ լայն զանգվածներ մասնակցեն տոնակատարությանը: Նրա խոսքերով, Երեւանի տարբեր հաստատություններում կանցկացվեն թատերական, գեղանկարչական, համերգային միջոցառումներ:
Այդ միջոցառումներից պարոն Մանասյանը առանձնացրեց փետրվարի 7-10-ը Սունդուկյանի անվան ազգային ակադեմիական թատրոնի ճեմասրահում անցկացվող գեղանկարչական մրցույթը, որը կամփոփվի ամսի 10-ին՝ մրցանակային 3 տեղերով:
Անուշ ՄԱԹԵՎՈՍՅԱՆ
