Լեռնային Ղարաբաղի շուրջ բանակցային գործընթացում առաջընթաց չկա, իսկ տեղերում նկատվում է իրավիճակի վատթարացում: Այս մասին ՏԱՍՍ գործակալության հետ զրույցում հայտարարել է ԵԱՀԿ գլխավոր քարտուղար Լամբերտո Զանիերը:
«Վերջին մի քանի օրերին դարձյալ միջադեպեր են գրանցվել: Մեզ շատ է անհանգստացնում այն, ինչ տեղի է ունենում: Մյունխենում ԵԱՀԿ Մինսկի խմբի համանախագահները (Ռուսաստան, Ֆրանսիա, ԱՄՆ) հանդիպել են Հայաստանի ու Ադրբեջանի արտգործնախարարների հետ: Քննարկումը եղել է դրական, բայց էական առաջընթաց չկա»,- ասել է Զանիերը:
Նա նշել է, որ իրենք պատրաստ են գործարկել բոլոր մեխանիզմները, որոնց շուրջ կողմերը պայմանավորվել են: «Այն պահին, երբ կստեղծվեն պայմաններ, մենք պատրաստ ենք գործարկել միջադեպերի հետաքննության մեխանիզմը: Բայց մենք չենք կարող կողմերին փոխարինել որոշումներ կայացնելու գործում»,- ասել է նա:
Զանիերը նշել է, որ առայժմ «առաջընթացը սահմանափակ է», և երկու երկրների նախագահների հանդիպման հնարավորության, ժամկետների և օրակարգի շուրջ պայմանավորվածություն չկա: «Դա առայժմ արդիական չէ»,- ասել է նա:
Կարդացեք նաև
Զանիերը նաև նշել է, որ տեղերում նկատվում է իրավիճակի վատթարացում՝ ծանր սպառազինության կիրառմամբ և քաղաքացիական անձանց շրջանում զոհերով:
Պատրաստեց՝ Վիկտորյա ԱՆԴՐԵԱՍՅԱՆԸ
