Զանգվածային անկարգություններին մասնակցելու մեջ մեղադրվող Արարատ Խանդոյանի՝ դատական նիստերի դահլիճից հեռացվելուց հետո Կենտրոն եւ Նորք-Մարաշ վարչական շրջանների ընդհանուր իրավասության դատարանի նախագահող դատավոր Մնացական Մարտիրոսյանը տասը րոպե ընդմիջում հայտարարեց:
Հիշեցնենք, որ Խանդոյանի գործով դատական նիստի ժամանակ այսօր միջադեպ գրանցվեց: Նախորդ դատական նիստի ժամանակ պաշտպանական կողմի ներկայացրած միջնորդությունների վերաբերյալ այսօր մեղադրողի առարկությունները հունից հանեցին Խանդոյանին, նա սկսեց միջամտել, ինչի պատճառով նախագահող դատավորը դատական սանկցիա կիրառեց նրա նկատմամբ՝ հեռացնելով նիստերի դահլիճից:
Տասը րոպե ընդմիջումից հետո Արա Ղարագյոզյանը հայտարարեց, որ ինքը նույնպես չի կարող մասնակցել նիստին, քանի որ նախ իր պաշտպանյալը հեռանալուց առաջ հայտարարեց՝ առանց իրեն ինքը չմասնակցի նիստին, բացի այդ էլ, ինքը Խանդոյանի հետ հանձնառություն ունի՝ առանց իր պաշտպանյալի ինքը որեւէ գործողություն չանի. «Ոնց կարող եմ մասնակցել այդ ապօրինի դատավարությանը, եթե իմ պաշտպանյալը չկա»:
Դատավոր Մնացական Մարտիրոսյանն էլ հայտարարեց, որ կարգապահական պատասխանատվության ենթարկելու որոշում կընդունի ու այդ հարցով կդիմի փաստաբանների պալատ:
Կարդացեք նաև
Մնացական Մարտիրոսյանը նաեւ հայտնեց, որ հանրային պաշտպան կհրավիրեն ու դատական նիստը կանցկացվի առանց Ղարագյոզյանի ու Արարատ Խանդոյանի:
Արփինե ՍԻՄՈՆՅԱՆ
