Փաստաբան Արա Ղարագյոզյանի ֆեյսբուքյան գրառումը
9 տարվա պայքարից հետո Վերաքննիչ քրեական դատարանը՝ նախագահող դատավոր Լուսինե Հովհաննիսյանի և դատավորներ Ռոբերտ Պապոյանի ու Մակար Կիրակոսյանի կազմով, հաստատեց ոստիկանի կողմից քաղաքացու ենթադրյալ խոշտանգման փաստը։ Դատարանը բավարարել է տուժողի ներկայացուցիչ Արա Ղարագյոզյանի և դատախազի բողոքները, բեկանել արդարացման դատավճիռը և Գերասիմ Մարդանյանին մեղավոր ճանաչել խոշտանգում կատարելու համար և դատապարտել 4 տարի 6 ամիս ժամկետով ազատազրկման:
Այս գործը միաժամանակ լուրջ հարցեր է առաջացնում խոշտանգումների վերաբերյալ գործերի քննության արդյունավետության և ժամկետների առումով։ Մարդու իրավունքների պաշտպանության տեսանկյունից դժվար է ընդունելի համարել, որ նման ծանր հանցագործության վերաբերյալ վարույթը դատարաններում տևել է շուրջ 9 տարի։
Տիկին Արփի Սարգսյա՛ն, հատկանշական է նաև, որ խոշտանգման գործով մեղադրյալը հետագայում նշանակվել է ղեկավար պաշտոնի ոստիկանության համակարգում։ Այս հանգամանքը մտահոգիչ է ոստիկանության համակարգի նկատմամբ հանրային վստահության և իրականացվող բարեփոխումների արդյունավետության տեսանկյունից։
Կարդացեք նաև
Սույն գործը կարևոր ուղերձ է Հայաստանի իշխանություններին, դատական համակարգին և ոստիկանությանը․ խոշտանգումների վերաբերյալ բոլոր պնդումները պետք է քննվեն արագ, արդյունավետ և միջազգային չափանիշներին համապատասխան, իսկ մարդու իրավունքների կոպիտ խախտումների համար պատասխանատվությունը պետք է լինի անխուսափելի։ Միայն այս կերպ հնարավոր կլինի ամրապնդել հանրային վստահությունը և կանխել նման դեպքերի կրկնությունը։
Խոշտանգումների դեմ պայքարը շարունակվում է:
