Ադրբեջանը խաղաղարար գործընթացը դատապարտում է ձախողման:
Ապրիլի 28ին, Մոսկուայում ռուսական կողմի նախաձեռնութեամբ անցաւ Ռուսաստանի, Հայաստանի եւ Ադրբեջանի արտաքին գործերի նախարարների հանդիպումը: Հանդիպումից, ի հարկէ, առանձնապէս ակնկալիքներ չկային, Ռուսաստանի ԱԳՆն էլ իր մամլոյ հաղորդագրութեան մէջ այն համեստօրէն անուանեց աշխատանքային հանդիպում, որտեղ շարունակուել էր բանակցային գործընթացի հեռանկարների քննարկումը: Ընդհանուր առմամբ, զարմանալի էլ չէ, քանի որ Ադրբեջանի կողմից սանձազերծուած անցած տարուայ ապրիլեան ագրեսիայից յետոյ, որը լուրջ վնաս է հասցրել ղարաբաղեան հակամարտութեան կարգաւորմանը, ԵԱՀԿ Մինսկի խմբի համանախագահներին դեռեւս չի յաջողւում լիարժէք բանակցային գործընթաց վարել: Ինչպէս յայտնի է, բանակցութիւնների վերսկսման համար կարեւոր նախապայման է հանդիսանում շփման գծում հնարաւոր միջադէպերի հետաքննութեան միջազգային մեխանիզմների ներդրումը, ինչը միջնորդների կողմից նախանշուած է որպէս առաջնահերթութիւն: Այսպէս եւ Մոսկուայում յիշեալ հանդիպմանն ընդգծուեց 2016թ. Մայիսին եւ Յունիսին Վիեննայի ու Սանկտ Պետերբուրգի գագաթնաժողովներին ձեռք բերուած համաձայնութիւնների իրականացման անհրաժեշտութիւնը:
Ինչպէս տեսնում ենք, անցել է գրեթէ մէկ տարի, բայց Մինսկի խմբի համանախագահներին մինչ օրս չի յաջողւում կեանքի կոչել վիեննեան ու սանկտպետերբուրգեան համաձայնութիւնները, որոնք Բաքուի մեղքով գայթակղութեան քար են դարձել: Արդեօք կը յաջողուի՞ այս անգամ: Խիստ կասկածելի է, եթէ միջնորդներն այսուհետ եւս շարունակեն Բաքուին մեղմ յորդորելու ներկայ մարտավարութիւնը: Որովհետեւ առաւել քան ակնյայտ է, որ Բաքուի ռեժիմը շահագրգռուած չէ հետաքննութեան մեխանիզմների ներդրման հարցում, քանի որ դրանցում իրաւացիօրէն խոչընդոտ է տեսնում հակամարտութեան գօտում իրավիճակի ապակայունացման իր քաղաքականութիւնը շարունակելու համար: Միջազգային վերահսկողութեան արդիւնաւէտ մեխանիզմների գործադրումը կտրուկ սահմանափակելու շփման գծում զինուած դիվերսիաներ կազմակերպելու ու հրադադարի ռեժիմը պարբերաբար խախտելու Բաքուի հնարաւորութիւնները, ինչպէս դա տեղի է ունենում հիմա: Եւ ադրբեջանական կողմի՝ հակամարտութեան խաղաղ կարգաւորմանը հաւատարիմ լինելու մասին փարիսեցիական յայտարարութիւնները հազիւ թէ ունակ են մոլորութեան մէջ գցելու ողջամիտ մարդկանց:
ԼԷՈՆԻԴ ՄԱՐՏԻՐՈՍԵԱՆ
Կարդացեք նաև
Նյութի մանրամասները կարդացեք «Ասպարեզ»–ի կայքում
