Օրերս ֆինանսների նախարար Վարդան Արամյանը Հանքավանում լրագրողների համար կազմակերպված դասընթացի ժամանակ ասաց, որ Հայաստանը Ռուսաստանի հետ քննարկում է նոր վարկ ստանալու հարցերը: Այս վարկը նախատեսված է պաշտպանության ոլորտի համար, ավելի կոնկրետ՝ պաշտպանության նախարարության: Պարոն Արամյանը չմանրամասնեց, թե որքան է վարկի չափը եւ այն արդյոք ուղղվելու է սպառազինության համալրմանը:
Aravot.am-ի հետ զրույցում պաշտպանության նախարարի մամուլի քարտուղար Արծրուն Հովհաննիսյանն էլ վարկի չափի եւ նպատակի մասին չմանրամասնեց. «Նպատակահարմար չենք գտնում եղած տեղեկությունից ավելին ասել: Երբ կարելի կլինի եւ ռազմական գաղտնիքի խնդիր չլինի՝ հանրությանը կտեղեկացնենք»:
Հիշեցնենք, 2016 թվականի փետրվարին Ռուսաստանը վավերացրեց Հայաստանին 200 միլիոն դոլար վարկ ստանալու համաձայնագիրը: Այս վարկը զենք-զինամթերք ձեռք բերելու համար է: 200 միլիոն «ռազմական» վարկով ձեռք բերված զենքի մի փոքր մասն է հասել Հայաստան հասել:
Վերջերս էլ «Իրազեկ քաղաքացիների միավորում» հ/կ-ի հարցմանն ի պատասխան կառավարությունից վստահեցրել էին, որ 200 միլիոն դոլարի նախատեսված զենքից ընդամենը 18% -ն է հասել Հայաստան:
Երբ եւ որքան զենք է նախատեսվում այդ 200 միլիոն դոլարի շրջանակներում տեղափոխել Հայաստան, մեր հարցին Արծրուն Հովհաննիսյանը հրաժարվեց պատասխանել:
Նելլի ԲԱԲԱՅԱՆ
