Էլեկտրոնային բժշկական քարտերի պարտադրանքի նախագծի մասին բարձրաձայնվել է «Առավոտով»: Համաձայն 2012թ. նախագծի՝ Հայաստանի բոլոր բնակիչների բժշկական տվյալները եւ հիվանդությունների պատմությունները ստիպողաբար տեղադրվելու են տվյալների բազայում համացանցում՝ դրանով վտանգի ենթարկելով մարդկանց: Եվ ավելին, դա լինելու է արտերկրի կառույցների հսկողության տակ: Ըստ «Ընդդեմ բիոմետրիկ փաստաթղթերի» միավորման ղեկավար Ա. Ռուբենի՝ այս ամենը խախտում է ՀՀ Սահմանադրությունը, անձնական, ընտանեկան, բժշկական գաղտնիքը, Մարդու իրավունքների հռչակագիրը, այս ամենը դաժան վերաբերմունք է, համոզմունքների փոփոխման փորձ, պետական ահաբեկչություն:
«Առավոտի» տեղեկություններով՝ խնդրի հետ կապված ՀՀ վարչապետին բաց նամակով իրենց կազմակերպությունների անունից դիմել են Հայ արիական միաբանության առաջնորդ Արմեն Ավետիսյանը, Հայ ազգայնականների համախմբման խորհրդի անդամ Աշոտ Բադալյանը, «Ընդդեմ բիոմետրիկ փաստաթղթերի» միավորման ղեկավար Ա. Ռուբենը, «Ընդդեմ մարդկանց համարակալման» միավորման խորհրդի անդամ Շահեն Ծատուրյանը, «Քրիստոնյաներն ընդդեմ մարդկանց համարակալման միավորման» նախագահ Խաչիկ Ստամբոլցյանը, Համահայկական ծնողական կոմիտեի հիմնադիր-անդամ Լիա Ավետիսյանը:
Մինչ այդ, նրանք դիմել էին առողջապահության եւ արդարադատության նախարարներին, որոնք պատասխանել են նրանց Բաց նամակին, ըստ նրանց գնահատականի՝ «շրջանցելով հարցերի գերիշխող մեծամասնությունը»:
Ինչ վտանգ կա, ինչու պետք է կանխել, ինչու է հակասահմանադրական «դրսից ղեկավարվող նախագիծը»՝ կարդացեք վաղվա «Առավոտում»:
«Առավոտ»
09.07.2017
