Դեբեդ գետի վրա նոր ՀԷԿ կառուցելու վերաբերյալ լուրերն արդեն մտահոգել են բնապահպան Ինգա Զառաֆյանին:
«Ըստ մեզ, մինչեւ կառավարությունը հավանություն տա այդպիսի օբյեկտների կառուցմանը, պետք է անպայման գոնե բնապահպանական բաղադրիչը հաշվի առնվի: Արդեն իսկ պետք է գոնե նախնական լինեն ռիսկերի ցանկը, դրանց գնահատումը: Օրինակ՝ պետք է ներկայացնեին, թե որտեղ պետք է կառուցվի, արդյոք ՀԷԿ-ի կառուցումը չի ազդի գետի ձկների տեսակների վրա կամ եթե ձկները գրանցված են Կարմիր գրքում, արդյոք կարելի է ՀԷԿ կառուցել: Ռիսկերը չեն գնահատել, բայց կառավարության հավանությունն արդեն կա»,- Aravot.am-ին ասաց բնապահպանը:
Նա նկատեց, որ սովորաբար ՀԷԿ-երի կառուցման դեպքում Հայաստանում հաշվի չեն առնում նաեւ սոցիալական գործոնը. «Պետք է հասկանան՝ մարդիկ, որոնք ապրում են փոքր ՀԷԿ-երի տարածքում, նրանք ինչ սոցիալական պահանջ ունեն այդ օբյեկտի նկատմամբ, այդ ՀԷԿ-երը սոցիալական, առողջապահական ինչ ազդեցություն են թողնում այդ մարդկանց վրա»:
Նշենք, որ կառավարության որոշման նախագծում ասվում է․ «Հավանություն տալ 76 ՄՎՏ դրվածքային հզորությամբ «Շնող» հիդրոէլեկտրակայանի նախագծման, կառուցապատման, ֆինանսավորման, կառուցման, սեփականության իրավունքով տնօրինման, տիրապետման, շահագործման մասին շրջանակային համաձայնագրին»։ Ըստ որոշման նախագծի, նախատեսվում է, որ ՀՀ կառավարությունը կաջակցի Կառուցապատողին ձեռք բերել հողատարածք՝ ՀԷԿ-ի կառուցման համար: Կայանի կոմերցիոն շահագործման ամսաթվից 20 տարուց ոչ պակաս ժամանակահատվածում ՀՀ կառավարությունը երաշխավորում է «Հայաստանի էլեկտրական ցանցեր» ՓԲԸ-ի կողմից տարեկան 500 մլն կՎտժ էլեկտրաէներգիայի գնում: ՀԷԿ-ի կառուցման համար որքան գումար է ներդրվելու, երբ է մեկնարկելու շինարարությունը եւ երբ է կառուցապատման ավարտը, նախագծում գրված չէ:
Ըստ տիկին Զառաֆյանի. «Կառավարության որոշումը դեռ չի նշանակում, որ նախագիծը ներկայացված է, ուղղակի հավանություն են տվել ՀԷԿ-ի կառուցմանը, եւ այն պլանավորված է կառավարության կողմից հաստատված Հիդրոէներգետիկայի զարգացման հայեցակարգի մեջ: Պետք է ուսումնասիրվի ու ներկայացվի տեխնիկական հիմնավորում, որով պետք է հաշվարկվեն՝ ինչ ՀԷԿ պետք է կառուցվի, ինչ հզորությամբ, այսպիսի հիմնավորում դեռ չունենք, երբ ունենանք, պետք է համեմատենք մեր ստանդարտների ու օրենսդրության հետ, նոր տանք մեր կարծիքը»:
Արփինե ՍԻՄՈՆՅԱՆ
