Աշխարհի առաջնությունից վերադառնալով՝ հունահռոմեական ըմբշամարտի Հայաստանի ազգային հավաքականի գլխավոր մարզիչ Լեւոն Ջուլֆալակյանն ամփոփեց մեր ընտրանու մրցելույթները:
«Մասնակցեցինք յոթ ըմբիշով եւ երկու չեմպիոն ունեցանք: Մասնակցությունը գերազանց եմ համարում: Արդյունքներից ընդհանուր առմամբ գոհ եմ: Որոշ քաշային կարգերում բացթողումներ ի հայտ եկան, որոնց վրա պետք է աշխատել:
Շատ գոհ եմ Մաքսիմ Մանուկյանից: Նա հինգ գերազանց գոտեմարտ անցկացրեց ու առավելությունը բոլոր մրցակիցների նկատմամբ ակնհայտ էր: Մաքսիմը միշտ հանդես էր գալիս 85 կգ քաշային կարգում ու ամեն անգամ մի փոքր չէր բավարարում մեդալի համար: Այս անգամ նրան փորձեցինք 80 կգ քաշային կարգում ու որոշումն արդարացվեց:
Արթուր Շահինյանը լավ մասնակցեց առաջին գոտեմարտում: Կարելի է ասել՝ հաջորդն էլ նրանն էր: Դժգոհ եմ Վարշամ Բորանյանի մասնակցությունից: Ես նրանից մեդալ էի ակնկալում: Նա պատրաստ էր եւ կարող էր: Բայց իմ կարծիքով Վարշամը քաշի կարգավորման խնդիր ունեցավ: 22-ամյա Վազգեն Խաչատրյանին մասնակցության հնարավորություն էինք տվել: Նա աճելու տեղ դեռ շատ ունի: Կարեն Ասլանյանը վատ չմասնակցեց: Բայց ես դժգոհ եմ նրա մարտաոճից, որը փորձում ենք փոխել: Նա դեռ մանկական մարտաոճի մեջ է: Եթե դրանից ձերբազատվի, մեծահասակների մեջ հաջողություններ կունենա», – ասաց Լեւոն Ջուլֆալակյանը:
Աշխարհի եռակի չեմպիոն, Արթուր Ալեքսանյանն էլ ասաց, որ հաղթանակներից չի հագենում, որ յուրաքանչյուր տիտղոս իր համար առանձնահատուկ է եւ շարունակելու է համալրել չեմպիոնական հավաքածուն:
«Մինչեւ 2020 թվականի Տոկիոյի օլիմպիական խաղեր ձգտելու եմ հաղթել բոլոր մրցաշարերում: Յուրաքանչյուր տիտղոս ինձ համար առանձնահատուկ է», – վստահեցնում է Ալեքսանյանը: Օլիմպիական չեմպիոնը ուրախ է Մաքսիմ Մանուկյանի ոսկե մեդալի համար, որը տարիների աշխատանքով էր արժանի չեմպիոնական տիտղոսին:
Ըմբիշները տպավորված են հատկապես տրիբունաներում իրենց երկրպագող հայ մեծաթիվ մարզասերներով, որոնց ջերմ աջակցությունը իրենց շատ է ոգեւորել:
ԱՇՈՏ ՀԱԿՈԲՅԱՆ
«Առավոտ»
24.08.2017
