Հունիսի 25-ից Վանաձորի գրադարանային համակարգում գործող 8 գրադարաններից 4-ը համայնքի ավագանու որոշմամբ օպտիմալացվեց: 3 գրադարաններ, որոնք տեղակայված են դպրոցներում, կհանձնվեն դպրոցներին, իսկ 1 գրադարան օպտիմալացման արդյունքում փակվեց:
Որոշման հետեւանքով կրճատվեց նաեւ հաստիքների թիվը: Նախկին 62 աշխատակցի փոխարեն՝ այժմ համակարգում աշխատում է ընդամենը 28-ը: Նախկին 57,5 դրույքի փոխարեն, օպտիմալացման արդյունքում գրադարանն ունի 21 դրույք:
Հիշեցնենք, որ օպտիմալացման որոշումը ընդունվել է ապրիլի 18-ին կայացած Վանաձորի համայնքի ավագանու հերթական նիստի ընթացքում: Որին կողմ էին քվեարկել ՀՀԿ եւ ՀՅԴ խմբակցության 15 անդամներ:
Որոշմանը դեմ է Վանաձորի ավագանու «Լուսավոր Հայաստան» խմբակցությունը: Կուսակցության ավագանու անդամ Արմեն Եղիազարյանը մեզ հետ զրույցում ասաց, որ իրենք ուսումնասիրել են գրադարանների փակման գործընթացը, եւ գտնում են, որ փակման որոշումը զուրկ է օրինական հիմքերից: Նրա խոսքով՝ գրադարանների փակման համար մինչ օրս չի ներկայացվել որևէ ողջամիտ հիմնավորում.
«Մենք բացահայտեցինք նաեւ 2009 թվականից փակված գրադարաններ, որտեղ գրքերն ամբողջովին ոչնչացված էին՝ բորբոսի ու փտած վիճակում էին գտնվում: 40.000 կտոր գիրքը, եթե գումարների վերածենք, համայնքային գույքի 100.000 դոլարի կորուստ է: Նախկին իշխանությունը ներկայիս նույն իշխանությունն է, եւ ձեռագիրն էլ պետք է նույնը լինի: Եվ մենք պատճառներ ունենք մտածելու, որ ներկայիս փակվող գրադարաններն էլ նույն ճակատագրին կարժանանան: Այսինքն, կփակվեն եւ անտերության մատնվելով՝ կոչնչացվի այդ գույքը»:
Խմբակցությունը օգոստոսի 16-ին նամակով դիմել է համայնքի ղեկավար Մամիկոն Ասլանյանին: Վերջիններս պահանջում են վերաբացել փակված գրադարանները եւ վերականգնել աշխատանքից ազատված մասնագետներին, կատարել նոր ուսումնասիրություններ. «Գրադարանները փակելն անօրինական որոշում է: Մենք չենք ասում, թե ընդհանրապես պետք չի օպտիմալացնել: Մենք ասում ենք, բերեք մի հատ լուրջ ուսումնասիրություն անենք, լուրջ մասնագետներ գան, տեսնենք՝ արդյոք կա՞ն խնդիրներ: Կամ եթե իրենք իսկապես արել են այդ վերլուծությունները, թող մի հատ ներկայացնեն, տեսնենք՝ արդյոք այդ խնդիրները եղե՞լ են: Մենք չենք տեսնում, որ այդ աստիճանի խնդիրներ կան: Մեկնաբանվում է, թե շենքային պայմանները շատ վատն են, այդտեղ հնարավոր չէ գրադարան պահել: Բայց ինչո՞ւ են շենքային պայմանները վատ, որովհետեւ տարիների ընթացքում համայնքապետարանը չի ֆինանսավորել, ծրագրեր չի իրականացրել, այդ աշխատակիցները չպետք է վերանորոգեին շենքերը: Այսինքն, դա իրենց բացթողումն է»:
ՏԱԹԵՎԻԿ ՂԱԶԱՐՅԱՆ
