Aravot.am-ը ԿԳ նախարար Լեւոն Մկրտչյանից հետաքրքրվեց՝ «Ուսուցիչ» նախաձեռնությունը ներկայացնելիս դուք ուսուցչի սոցիալական կարգավիճակի մասին խոսեցիք, ասացիք, որ ուսուցչի մասնագիտությունը պետք է դարձնեք հրապուրիչ, արտոնություններ տաք, նրա ապրելակերպը պետք է փոխեք՝ առաջիկայում Ազգային ժողովին ուսուցիչների աշխատավարձերը բարձրացնելու առաջա՞րկ եք ներկայացնելու՝ Լեւոն Մկրտչյանը պատասխանեց. «Կփորձենք ներդրված տարրակարգերը վերանայել՝ նաեւ դնելով այդ կոմպոնենտը»:
Հարցրեցինք՝ բայց բյուջեում կա՞ նման հնարավորություն աշխատավարձ բարձրացնելու՝ նախարարը պատասխանեց. «Կփորձենք գտնել: Հիմա նայում ենք թվերը, հասկանանք, որովհետեւ առանց մոտիվացիայի յուրաքանչյուր աստիճանի, մենք չենք կարողանա շահագրգռել ուսուցչին, տարիֆիկացիաները՝ երկրորդ, երրորդ, չորրորդ, յուրաքանչյուրը պետք է ունենա իր վարձատրության աստիճանը»:
Մենք ճշտեցինք՝ ուսուցիչներն ունենալո՞ւ են սոցփաթեթներ՝ նախարարը պատասխանեց. «Այո, արտոնություններ, սոցփաթեթներ, ուսուցչի բնակարանի գաղափարը, եթե գնում է սահմանամերձ շրջաններ, տրամադրենք հողատարածք, ուզում ենք այսպիսի մի ամբողջական փաթեթ մշակել»:
Նախարարը խոստացավ, որ հոկտեմբերին արդեն այդ ամբողջ ծրագիրը պատրաստ կլինի: Իսկ թե ե՞րբ կիրականացնեն, հնարավո՞ր է մինչեւ 2030-ը նոր դա իրականություն դառնա՝ Լեւոն Մկրտչյանը պատասխանեց. «Չէ, առաջիկա մեկ-երկու տարիների ընթացքում դա կլինի»:
Հռիփսիմե ՋԵԲԵՋՅԱՆ
