ՀՀ վերաքննիչ քրեական դատարանն այսօր որոշեց մերժել «Հիմնադիր խորհրդարան» ընդդիմադիր շարժման աջակից, քաղաքացիական ակտիվիստ Գեւորգ Սաֆարյանի վերաքննիչ բողոքը: Դատարանի որոշումը կարող է բողոքարկվել ՀՀ վճռաբեկ դատարանում:
Գեւորգ Սաֆարյանը հայտարարեց՝ չնայած դատավոր Անդրանիկ Մնացականյանը բողոքի քննության ժամանակ պնդեց, որ իր պարագայում հնարավոր չէ դատական ակտ պատվիրել, հանրությունը շատ լավ գիտի, որ դատական իշխանությունն անկախ չէ. «Քաղաքական գործերով միշտ պատվեր է իջեցվում: Չկա դատարան, որը չի ենթարկվում իշխանությանը»:
Նիստի ավարտին Գեւորգ Սաֆարյանը, մինչեւ ոստիկանները կուղեկցեին իրեն, լրագրողներին տեղեկացրեց, որ «Նուբարաշեն» ՔԿՀ-ում ինքն այլեւս բանտախցի անբարենպաստ պայմանների խնդիր չունի. «Ես հիմա հատուկ պահպանվող մասնաշենքում եմ: Այդտեղ քրեական հեղինակությունների կողմից ինձ անհանգստացնելու խնդիրն էլ չկա»:
Լուիզա ՍՈՒՔԻԱՍՅԱՆ
