Հայաստանի հաշմանդամների «Փյունիկ» միություն» հասարակական կազմակերպությունը Սևանում երեք հերթափոխով կազմակերպել է մարզավերականգնողական ճամբար հաշմանդամություն ունեցող երեխաների և երիտասարդների համար։
Ըստ պաշտոնական տվյալների՝ մեր երկրում կա հաշմանդամություն ունեցող 200 հազար անձ, որից 8600-ը՝ մինչև տասնութ տարեկան երեխաներ են: Հաշմանդամություն ունեցող երեխաների և երիտասարդների հանգստի, հաշմանդամային մարզաձևերին իրազեկելու, մարզվելու, ավելի ակտիվ և ինտեգրված լինելու խնդիրը լուծելու համար էլ «Փյունիկը» նախաձեռնել է այս ծրագիրը:
Հասարակական կազմակերպության նախագահ Հակոբ Աբրահամյանը նկատեց, որ յուրաքանչյուր հերթափոխի տևողությունը տասը օր էր։ Ընդհանուր առմամբ ճամբարին մասնակցում էր հաշմանդամություն ունեցող մոտ 80 պատանի և երիտասարդ։ Ճամբարին ընդգրկվել են նաև ապրիլյան պատերազմին մասնակցած տղաներ, որոնք հաշմանդամություն են ձեռք բերել։ Նրանք ծանոթացել են տարբեր մարզաձևերի հետ, և հասարակական կազմակերպությունը կօգնի նրանց հետագայում զբաղվելու իրենց նախընտրած սպորտաձևով։
Հաշմանդամություն ունեցող երեխաների և երիտասարդների համար ամառային մարզավերականգնողական ճամբարը միաժամանակ մի քանի խնդիր է լուծում. այն ապահովում է մասնակիցների ակտիվ հանգիստը, հնարավորություն է տալիս զբաղվելու հաշմանդամների մարզաձևերով, դառնալու ինքնուրույն և ինքնավստահ, ապահովում սոցիալիզացիան: Կազմակերպության ամառային ճամբարներ ընդգրկվելու քաղաքականությունը բավականին հետաքրքիր է, քանի որ երեխաները հերթափոխներին մասնակցում են առանց ծնողների: Սա կազմակերպությանը հնարավորություն է տալիս առավելագույնս ինքնուրույն դարձնել երեխաներին և մեղմել շատ ընտանիքներում առկա գերխնամքը, ինչն իրականում ոչ թե օգնում է հաշմանդամություն ունեցող երեխային, այլ խանգարում նրա հետագա ինտեգրմանը հասարակություն: Ճամբարի հերթափոխերում ընդգրկվել են նաև մանկատների հաշմանդամություն ունեցող սաները:
Մարզավերականգնողական ճամբարը կազմակերպվել է ՀՀ Նախագահի աշխատակազմի կողմից հատկացված դրամաշնորհի և Հայաստանի երիտասարդական հիմնադրամի հայտարարած մրցույթի շրջանակներում։
Հայաստանի երիտասարդական հիմնադրամի հասարակայնության հետ կապերի ծառայություն
Այսպես էլ բա՞ռ լինի, 20 տառից է կազմված։
Իհարկե լավ, շա՛տ լավ և ուշացված ձեռնարկ է։
Մարզման միջոցով լավացնել, ամրացնել երեխաների և մեծերի առողջությունը, բայց 10 օրը շատ քիչ է։
Նոր դրամահավաք պետք է կատարվի։