«Սեֆիլյանի եւ մյուսների» գործով դատական նիստում այսօր այդպես էլ ոչ մի դատավարական գործողություն չիրականացվեց: Նախ, նիստը 40 րոպեով ընդմիջվեց, քանի որ ամբաստանյալ Հրայր Թոփչյանի պաշտպան, փաստաբան Վահագն Մարտիրոսյանը դատարանին տեղեկացրել էր, որ առողջական խնդիրներ ունի:
Դատավոր Տաթեւիկ Գրիգորյանի որոշմամբ՝ կողմերը եւս 1,5 ժամ նրան սպասեցին, սակայն փաստաբանը չներկայացավ, ուստի դատավորը որոշեց հետաձգել նիստը: Ամբաստանյալներից Հովհաննես Պետրոսյանը հայտարարություն արեց եւ դժգոհեց այն փաստից, որ նիստերն արհեստականորեն ձգձգվում են, եւ ինքը ցանկանում է, որպեսզի դատաքննությունը շուտ ավարտվի:
Պետրոսյանի շահերի պաշտպան, փաստաբան Արսեն Մկրտչյանն Aravot.am-ի հետ զրույցում ընդգծեց՝ Հովհաննես Պետրոսյանին մամուլում ներկայացնում են որպես Ժիրայր Սեֆիլյանի դեմ ցուցմունք տված միակ անձ, սակայն իրականում Պետրոսյանի դեմ են ցուցմունք տվել ձերբակալված անձինք, ինչին հաջորդել է Պետրոսյանի ցուցմունքը: «Նա ունեցել է մեկ նպատակ՝ չկրակել հայի վրա, չհարձակվել հայկական զորամասի վրա…Նա ցանկանում է հնարավորինս շուտ հասկանալ, թե ինչու են իրեն դատապարտում»,-վստահեցրեց Մկրտչյանը:
Հաջորդ նիստը կկայանա մյուս ուրբաթ:
Լուիզա ՍՈՒՔԻԱՍՅԱՆ
