Լոռու մարզի համանուն գյուղում է գտնվում Սանահինի միջնադարյան վանական համալիրը: Այն կառուցվել է 966 թ-ին, հայոց թագավոր Աշոտ Գ Ողորմածի աջակցությամբ: Համալիրը դարձել է Կյուրիկյանների վարչական կենտրոնն ու տոհմական դամբարանը: Եղել է նաեւ միջնադարյան հոգեւոր ու գիտակրթական խոշոր կենտրոն: Սանահին անունը ստացել է Հաղպատի վանքի կառուցումից հետո, որը նշանակում է՝ «Սա նրանից հին է»:
Սանահինի համալիրի կազմում են Սուրբ Աստվածածին եւ Սուրբ Ամենափրկիչ եկեղեցիները, 3 գավիթ, գրատունը, զանգակատունը, ակադեմիան, Սուրբ Գրիգոր փոքրաչափ եկեղեցին` մատուռը։ Վանքի եւ շրջակա տարածքում պահպանվել է ավելի քան 50 խաչքար:
1996 թվականին ՄԱԿԳՄԿ-ի կողմից Հաղպատի վանքի հետ միասին Սանահինի վանական համալիրը ճանաչվել է համաշխարհային մշակութային ժառանգության մաս:
Տաթեւիկ ՂԱԶԱՐՅԱՆ
Նյութը պատրաստվել է «Բացահայտիր երկիրդ» արշավի շրջանակում՝ ՀՀ տնտեսական զարգացման եւ ներդրումների նախարարության Զբոսաշրջության պետական կոմիտեի եւ Հայաստանի զբոսաշրջության զարգացման հիմնադրամի աջակցությամբ:
