Ինչպես ավելի վաղ հայտնել էինք, ՀՀ զինված ուժերի 2018-24թթ. արդիականացման ծրագրում (որն օրերս հրապարակել է ՀՀ պաշտպանության նախարարությունը) նախանշված են 2018-2024թթ. համար կանխատեսելի որոշ իրողություններ, որոնք բխում են ՀՀ անվտանգային միջավայրի առանձնահատկություններից և ռազմական սպառնալիքների բնույթից: Փաստաթղթում նաեւ գրված է, որ հաշվի առնելով այդ իրողությունները և դրանց զարգացման միտումները՝ 2018-2024թթ. ժամանակահատվածում ՀՀ-ն
-կշարունակի պահել և զարգացնել զորակոչային և պայմանագրային համալրմամբ զինված ուժեր՝ սպառազինության և ռազմական տեխնիկայի արդիական միջոցների կիրառմամբ հնարավորինս մեծ ռազմական արդյունավետության միջոցով ապահովելով պաշտպանունակության ցանկալի մակարդակը,
-կընդլայնի ռազմավարական դաշնակցային հարաբերությունները Ռուսաստանի Դաշնության հետ և ՀԱՊԿ շրջանակներում՝ այն դիտելով որպես ազգային անվտանգության համակարգի կարևոր բաղադրիչ և շահագրգիռ մասնակցություն ունենալով ՀԱՊԿ-ի հետագա ամրապնդմանն ուղղված նախաձեռնություններին,
-կզարգացնի անվտանգության ոլորտում գործընկերային հարաբերությունները ԱՄՆ-ի, Չինաստանի, եվրոպական և այլ երկրների հետ, ինչպես նաև ՄԱԿ-ի, ԵԱՀԿ-ի, ՆԱՏՕ-ի և մյուս միջազգային կազմակերպությունների շրջանակներում,
-կշարունակի գործընկեր հարևան երկրների հետ հավասարակշռված բարիդրացիական հարաբերությունների զարգացման քաղաքականությունը, ներառյալ՝ տարանցման ուղիների բազմազանեցման, դրանց անխափան գործունեության ուղղությամբ: Հաշվի առնելով Թուրքիայի և Ադրբեջանի հետ հարաբերությունների բացակայությունը՝ տրանսպորտային ուղիների շրջափակումը կպահպանվի,
-կզարգացնի նոր տեխնոլոգիաների վրա հիմնված գիտատար տնտեսական ճյուղեր և պաշտպանական ծախսերին կհատկացնի ՀՆԱ-ի ոչ պակաս, քան 4%-ը,
-առաջընթաց կունենա ժողովրդավարական բարեփոխումների ուղղությամբ, կբարելավի սոցիալական և ժողովրդագրական իրավիճակը,
-միջոցներ կձեռնարկի զինված ուժերում ծառայության տեսակների ընդլայնման, զինվորական ծառայության նկատմամբ սոցիալական ու մասնագիտական գրավչության, կոռուպցիայի դեմ պայքարի և հանրային վստահության բարձրացման, կադրային և մասնագիտական առաջխաղացման արդարության սկզբունքների վերարժևորման հարցերում,
-կիրականացնի մարտական պատրաստականության հետևողական բարձրացման, ռազմական կրթության և գիտության արդյունավետ ներուժի ձևավորման, ժամանակակից տեխնիկայի ու սպառազինության տեսակների արհեստավարժ կիրառմանն ուղղված նպատակային քաղաքականություն:
Պատրաստեց Լուիզա ՍՈՒՔԻԱՍՅԱՆԸ
