Այս տարվա փետրվարի 18-ից Երեւան քաղաքի ընդհանուր իրավասության դատարանի դատավոր Ռուբեն Ափինյանի վարույթում է գտնվում լրագրող Արթուր Հովհաննիսյանի հայցն առողջապահության նախկին նախարար Լեւոն Ալթունյանի դեմ:
Այդ գործով երրորդ անձ է ճանաչվել «Առավոտ» օրաթերթը:
Հայցվոր լրագրողը վիճարկում է ԱՆ պաշտոնական կայքում «Պետք չէ ապավինել կեղծիքին, Շիրակի մարզի Այգաբաց համայնքի դպրոցում պատվաստումներ կատարելու փորձ չի եղել» վերտառությամբ տեղեկատվությունը: Լրագրողի կարծիքով՝ իր նկատմամբ առկա է վիրավորանք, զրպարտություն, ինչը պահանջում է հերքել, իրենից խնդրել հրապարակային ներողություն:
«Առավոտը» ԱՆ տեղեկությունը տպագրել էր որպես պաշտոնական տեղեկություն:
Գործի նախապատրաստման փուլում փոխվել է նախարարը, իսկ նոր նախարար Արսեն Թորոսյանը մայիսի 17-ին միջնորդություն է ուղարկել դատարան:
«Սույն գործով պարզելու համար արդյոք առողջապահության նախարարության պաշտոնական www.moh.am-ում 2017 թվականի դեկտեմբերի 11-ին հրապարակված նյութում տեղ գտած, հայցվորի կողմից որպես զրպարտություն որակված «Պետք չէ ապավինել կեղծիքին», «Այնպես որ, պետք չէ ապավինել կեղծիքին եւ ստահոդ լուրերին: Ժամանակն է սթափվելու…» արտահայտությունը հիմնվո՞ւմ է ստույգ փաստերի վրա, թե՞ ոչ, անհրաժեշտություն է առաջացել պարզելու.
1. Արդյոք առողջապահության նախարարությունը խոսե՞լ է Այգաբացի միջնակարգ դպրոցի տնօրեն Հռիփսիկ Հուրոյանի հետ եւ արդյոք պարզե՞լ է այնտեղ տեղի պոլիկլինիկայի աշխատակիցների կողմից մարդու պապիլոմա վիրուսի պատվաստում կատարելու հանգամանքը:
2. Շիրակի մարզի Այգաբաց գյուղի պոլիկլինիկայի աշխատակիցների՝ Այգաբաց գյուղի միջնակարգ դպրոց այցելելու նպատակը:
3. Արդյոք ՀՀ առողջապահության նախարարության պաշտոնական կայքում նշյալ նյութում կատարված մեջբերումը համապատասխանո՞ւմ է իրականությանը. «Նախարարությունը խոսել է Այգաբացի դպրոցի տնօրենի հետ եւ պարզել, որ այնտեղ որեւէ մեկը չի պատվաստվել, պատվաստում կատարել: Պարզապես սահմանված կարգով, համայնքի մանկաբույժը եւ բուժքույրը հանդիպում են ունեցել ծնողների հետ եւ ներկայացրել պատվաստման նպատակն ու ակնկալվող արդյունքը: Հանդիպմանը երեխաներ չեն մասնակցել եւ որեւէ մեկը բուժաշխատողներին չի վռնդել»:
Նախարարը միջնորդել է, որպեսզի դատակոչվի դպրոցի տնօրեն Հռիփսիկ Հուրոյանը:
Ռ. ՄԻՆԱՍՅԱՆ
«Առավոտ»
23.05.2018
