Այսօր ԱԺ գիտության, կրթության, մշակույթի, երիտասարդության եւ սպորտի հարցերի հանձնաժողովի նիստում քննարկվում էր «Հեռուստատեսության եւ ռադիոյի ազգային հանձնաժողովի 2017 թվականի գործունեության մասին» հաղորդումը:
Հետեւաբար, պատգամավորներին չէր կարող չհետաքրքրել եթերի հարցը, թե ինչ են ցուցադրում հեռուստաընկերությունները:
Խոսելով հնդկական սերիալների մասին՝ ՀՌԱՀ նախագահ Գագիկ Բունիաթյանն ասաց, որ ԱԺ-ում երբ քննադատում են, հեռուստաընկերությունները ականջալուր են դրանց, բայց կա շուկայի պահանջ, անգամ աշխարհի առաջատար հեռուստաընկերություններն իրենց եթերացանկում ունենում են 2-3 սերիալ: Նա ասաց, որ այդ առումով հանձնաժողովն ունի սահմանափակ լիազորություններ: Հետո վստահեցրեց. «Իրականում հնդկական սերիալների մեջ էդքան վատ բան չկա, մշակույթն է իրենց»: Բունիաթյանն ասաց, որ դա հասարակության մի հատվածի համար է, մյուսները չեն դիտում:
Հանձնաժողովի նախագահ Վարդան Բոստանջյանը արձագանքեց. «Շատ վատ եք անում, որ չեք դիտում»: Պարզվեց՝ Բոստանջյանը հնդկական սերիալներից մեկի սիրահարն է:
Նախ, Բունիաթյանն ասաց, որ հիմա հնդկական սերիալ դիտելը թրենդի մեջ է. «Խնդրում եմ, մեր հայկական սերիալները դիտեք ու լեզվին ուշադիր եղեք: Հնդկականը դրեք մի կողմ, պարեր են այնտեղ, իմ ծնողն էլ է նայում: Մեր հայկական սերիալներում դրվագները նայում ես՝ այնպիսի գեղեցիկ գեղարվեստական, գրական լեզվով են խոսում, արհեստական է դառնում: Լեզվի խնդիր իրականում չկա, բայց եթե էդ կերպարը…գեղարվեստական հյուսվածքի ներկայացման խնդիր ունենք»:
Բոստանջյանն անկեղծացավ. «Ես համ տեսած մարդ եմ, համ կարդացած: Բայց արեք տեսեք, որ նայում եմ «Հարսիկը» սերիալը ու ինչ բարոյական բաներ կան: Սկզբից ծիծաղով էի նայում, գիտեք, հիմա հետաքրքիր եմ նայում էդ դաստիարակչական պահերը՝ առանց չափազանցության»:
Գագիկ Բունիաթյանն ասաց, որ պետք է այնպես անել, որ գովազդատուներն էլ չտուժեն, հեռուստաընկերություններն էլ չտուժեն ու հանրության այն հատվածը, որի երջանկության մեխանիկան հնդկական սերիալ նայելն է, իրենք էլ չտուժեն: Մտածում են, որ գուցե գովազդները տեղաբաշխեն այլ հատվածներում էլ, ոչ միայն սերիալների արանքում:
Հռիփսիմե ՋԵԲԵՋՅԱՆ
