«Երեւանի ծայրամասերում չկան անգամ սրճարաններ եւ հանգստի վայրեր, առօրյան կազմակերպելը դժվար է՝ ի տարբերություն կենտրոնի»,-«Հայելի» մամուլի ակումբում այսօր լրագրողների հետ հանդիպմանն ասաց Երեւանի հատակագծի հեղինակ՝ ճարտարապետ Ալեքսանդր Թամանյանի թոռնուհին՝ Լուսինե Քարամյանը, որը սեպտեմբերի 23-ին կայանալիք Երեւանի ավագանու ընտրություններում առաջադրվել է որպես ավագանու թեկնածու՝ «Հայ հեղափոխական դաշնակցության» ցուցակով:
Նա առաջարկում է Երեւանում հիմնել արվեստի կենտրոններ, որտեղ կարող են այցելել նաեւ անապահով ընտանիքների երեխաները:
«Երեւանյան լճի տարածքում եւ Հրազդանի կիրճում երեկոյան ժամերին վախենում ես գտնվել, մինչդեռ դրանք ժամանակին հանգստի գոտիներ են եղել: Հիմա դրանք բավականին աղտոտված են: Կարծում ենք, որ այդ տարածքները պետք է վերադարձվեն Երեւանի բնակիչներին: Մեր նախընտրական ծրագրում ներառված են այդ կետերը»,-նշեց նա:
Ինչ վերաբերում է հարցին, թե Երեւանը որքան է շեղվել թամանյանական հատակագծից եւ ինչ պետք է անել՝ այն վերականգնելու համար, Լուսինե Քարամյանը տեղեկացրեց՝ ՀՅԴ երիտթեւի նախաձեռնությամբ որոշակի ուսումնասիրություններ են կատարվել, խոսել են ճարտարապետների հետ:
«Թամանյանական նախագծից շեղումներն ահռելի են՝ ոչ միայն կենտրոնում, այլեւ դրանից դուրս: Կարծում ենք՝ Երեւանի իշխանությունը պետք է միջոցներ գտնի՝ Երեւանն այդ շեղումներից որոշ չափով վերականգնելու համար»,-համոզմունք հայտնեց անվանի ճարտարապետի ծոռնուհին: Հիշեցնենք, որ ՀՅԴ քաղաքապետի թեկնածուն է Միքայել Մանուկյանը:
Լուիզա ՍՈՒՔԻԱՍՅԱՆ
