Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում Թունիսի արտգործնախարար Խեմայիս Ջհինավիի հետ հարցուպատասխանի ընթացքում ադրբեջանական պատվիրակության անդամները կրկին հիշեցրին ղարաբաղյան հակամարտության մասին:
Ադրբեջանական պատվիրակության անդամ Ռաֆայել Հուսեյնովը, հղում կատարելով տարածքային ամբողջականության մասին ՄԱԿ-ի բանաձևերին, հիշեցրեց, որ Թունիսը ևս ՄԱԿ-ի բանաձևերը ստորագրել է, հետևաբար հույս ունենա՞ն, որ Թունիսը լրացուցիչ ջանքեր կգործադրի Հայաստանին պարտադրելու կատարել այդ պարտավորությունները:
Թունիսի ԱԳ նախարարը հայտարարեց, որ Թունիսը կատարում է իր միջազգային պարտավորությունները, բայց չի ցանկանում խառնվել տեղական խնդիրներին. «Մենք չենք ցանկանում խառնվել այն խնդիրներին, որոնք բնորոշ են երկու կոնկրետ երկրներին: Ադրբեջանն ու Հայաստանը երկու հարևան պետություններ են, և մենք հույս ունենք, որ նրանք իրենց խնդիրները կլուծեն խաղաղ ճանապարհով, բայց մենք չենք պատրաստվում անցնել մեկի կողմը»:
Տաթև ՀԱՐՈՒԹՅՈՒՆՅԱՆ