Քինոան (սագախոտը) համեմատաբար նոր սննդատեսակ է ոչ միայն Հայաստանում, այլեւ՝ Արեւմուտքում եւ տարածաշրջանում, այնինչ ունի հազարամյակների պատմություն, եւ եղել է ամերիկյան հնդկացիների գլխավոր սննդամթերքներից մեկը՝ կարտոֆիլի եւ եգիպտացորենի հետ միասին: Իր օգտակարության շնորհիվ քինոան այսօր արդեն բավականին տարածում է գտել առողջ սննդի սիրահարների շրջանում: Հայաստանի սուպերմարկետներում վաճառվում է սագախոտը, ընդ որում՝ արդեն նաեւ տեղական արտադրության: Քինոայից կարելի է պատրաստել ոչ միայն շիլա, փլավ, այլեւ՝ աղցաններ:
Այսօրռաջարկում եմ շատ համեղ բուսական աղցան՝ քինոայով եւ թարմ բանջարեղենով:
Անհրաժեշտ մթերքները
Քինոա (կարող եք վերցնել ինչպես միագույն՝ սեւ, կարմիր կամ դեղնավուն, այնպես էլ դրանց խառնուրդը)- 1 բաժակ
Կարդացեք նաև
Բանջարեղենը կարող եք վերցնել ըստ ճաշակի՝ թե տեսակի, թե քանակի առումով: Կոնկրետ դեպքում ես վերցրել եմ մի քանի կտոր բրոկոլի, մի քանի կտոր ծաղկակաղամբ, մեկ վարունգ, կես կարմիր եւ կես դեղին թարմ պղպեղ, կես հատ կարմիր սոխ, թարմ կանաչիներ
Մարինացված վարունգ-3-4 հատ (դրա փոխարեն կարող եք վերցնել մարինացված սունկ կամ ձիթապտուղ)
Պահածոյացված եգիպտացորեն- մի քանի ճաշի գդալ
Աղ, սեւ պղպեղ-ըստ ճաշակի
Բուսական յուղ (ցանկալի է ձիթապտղի, բայց կարող եք վերցնել նաեւ եգիպտացորենի կամ արեւածաղկի)-4-5 ճաշի գդալ
Պատրաստման եղանակը
Քինոան եփվում է ճիշտ բրնձի պես՝ լավ լվացեք եւ 15-20 րոպե եփեք առատ ջրով, որի մեջ մի քիչ աղ է արված, այնուհետեւ քամեք:
Մինչ սագախոտը եփվում է մաքրեք սոխը, լավ լվացեք բրոկոլին, ծաղկակաղամբը, թարմ պղպեղները, կանաչիները, վարունգը: Բրոկոլին եւ ծաղկակաղամբը 2-3 րոպեով գցեք եռացող ջրի մեջ, շատ չթողնեք, որ բրոկոլին գույնը չփոխի, եւ կաղամբազգիները չկորցնեն վիտամինները:
Մանր կտրատեք թարմ բանջարեղենը, ինչպես նաեւ մարինացված վարունգը, ավելացրեք եգիպտացորենը, համեմունքները, ցանկության դեպքում կարող եք ավելացնել նաեւ մաքրած արեւածաղկի կամ դդմի սերմեր:
Եփված, քամված եւ արդեն սառած քինոան ավելացրեք աղցանին, վրան լցրեք նաեւ բուսայուղը եւ լավ խառնեք: Մատուցեք անմիջապես:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
