Ո՞վ է «Հինգերորդ ալիքի» սեփականատերը

«Հինգերորդ ալիք»՝  նախկին «Արարատ» հեռուստաընկերության լրատվական բլոկի ղեկավար Հարություն Հարությունյանը հաստատում է տեղեկությունը , որ հեռուստաընկերության սեփականատերը՝ Ռոբերտ Քոչարյանի մերձավոր շրջապատի ներկայացուցիչներից Արմեն Թավադյանը,  «Քաղաքացիական պայմանագիր» կուսակցության վարչության անդամ, ԱԺ փոխնախագահ Ալեն Սիմոնյանի քավորն է:

Նշենք, որ լրատվամիջոցներում բազմաթիվ հրապարակումներ եղան, թե  «Արարատը» գնել է հենց Ռոբերտ Քոչարյանը:

Հիշեցնենք, որ ավելի վաղ Հարությունյանն ասել էր, թե ինչ վերաբերում է հեռուստաընկերության սեփականատիրոջն ու Քոչարյանի օգտին քարոզչությանը. «Բոլորին հայտնի է՝ ով է հեռուստատեսության սեփականատերը։ Հեռուստատեսության սեփականատերը որքան որ Ռոբերտ Քոչարյանի մարտական ընկերն է, այնքան էլ ինքը այսօր իշխող կուսակցության ներկայացուցիչներից մեկի քավորն է»։

Aravot.am-ը փորձեց զրուցել նաեւ Ալեն Սիմոնյանի հետ, վերջինս հեռախոսազանգերին ողջ օրը չպատասխանեց:

 Ղարաբաղյան ազատագրական պատերազմ (1988—1994) հանրագիտարանում Արմեն Թավադյանի մասին նշված է. «Արմեն Սերգեյի Թավադյան (մայիսի 3, 1968, Ստեփանակերտ), հայ քաղաքագետ։ Ավարտել է Երևանի ժողտնտեսության ինստիտուտը (այժմ՝ Հայաստանի պետական տնտեսագիտական համալսարան, 1990) Ռուսաստանի Դաշնության, Ազգային Ժողովի Նախարարության, Մոսկվայի դիվանագիտության ակադեմիան (2000)։ 1993 թվականից՝ ԼՂՀ ներկայացուցչության ղեկավար Ռուսաստանում (Մոսկվա)։

Մասնակցել է Քարինտակի ինքնապաշտպանությանը, Աղբուլաղի և Մադաղիսի ազատ գրական մարտերին։ Թավադյանը Մոսկվայում հիմնադրել է ներկայացուցչական և տեղեկատվական-վերլուծական ծառայություն, ստեղծել Ռուսաստանի Դաշնության Պետդումայի քաղաքական ղեկավարության հետ տարվող աշխատանքների կոնտակտային խումբ։ Մոսկվայում և ՌԴ այլ քաղաքներում կազմակերպել է նյութական օգնություն Արցախին»:

Արփինե ՍԻՄՈՆՅԱՆ