Այսօր Վերաքննիչ քրեական դատարանում երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը եւս երկու ամսով երկարացնելու վերաբերյալ առաջին ատյանի որոշման դեմ պաշտպանական խմբի կողմից ներկայացված բողոքի քննությունն է: Ռոբերտ Քոչարյանը մասնակցում է նիստին:
Մամուլում հրապարակումներ եղան, որ այն դատավորը, որը պետք է քննի բողոքը՝ Ռուզաննա Բարսեղյանը, ժամանակին պարգեւատրվել է Ռոբերտ Քոչարյանի կողմից, մեդալ է ստացել, ուստի քիչ առաջ պաշտպան Հայկ Ալումյանը լրագրողների հետ զրույցում հարցին՝ սա ինքնաբացարկի հիմք կարո՞ղ է դառնալ՝ պատասխանեց. «Ես էլ լսել եմ, որ նա պարգեւատրված է եղել պարոն Քոչարյանի կողմից: Պարոն Քոչարյանն այդպիսի բան չհիշեց, բայց ինչը հաստատ գիտեմ, որ նա Ամերիկյան դեսպանատան կողմից է նաեւ պարգեւատրված եղել եւ եթե այս ամեն ինչը իրար գումարենք, կստացվի, որ երեւի լավ դատավոր է: Եթե Ամերիկյան դեսպանատունը իր հերթին է համարել, որ լավ դատավոր է, պարոն Քոչարյանն էլ իր հերթին է համարել, միգուցե ուրիշ պարգեւատրումներ էլ ունի, դա մեզ ուրախացնում է եւ ինքնաբացարկի հիմք ես կարծում եմ, դա հանդիսանալ չի կարող»:
Հռիփսիմե ՋԵԲԵՋՅԱՆ
