Այսօր վարչապետ Նիկոլ Փաշինյանն ասաց, որ հարց է՝ արդյոք Նաիրա Զոհրաբյանը համապատասխանո՞ւմ է ԱԺ մարդու իրավունքների եւ հանրային հարցերի հանձնաժողովի նախագահի պաշտոնի համար նվազագույն պահանջներին: Վարչապետը նկատի ուներ այն, թե Նաիրա Զոհրաբյանն ինչպես արձագանքեց խորհրդարանական լսումների ժամանակ տրանսգենդեր Լիլիթ Մարտիրոսյանի ելույթին:
Այսօր ԱԺ-ում լրագրողների հետ զրույցում ԲՀԿ պատգամավոր Վարդան Ղուկասյանը հայտարարեց, որ Նաիրա Զոհրաբյանը շատ լավ աշխատում է. «Ընդհանրապես խայտառակություն է, որ երկրի թիվ մեկ քաղաքական ամբիոնը պետք է տրամադրեն նմանատիպ մարդկանց: Ընդհանրապես չեմ էլ ուզում դրանց, էդ մարդկանց անունները տալ, որովհետեւ նպաստում ենք երեխաների այլասերմանը»:
Դիտարկմանը, որ բոլոր մարդիկ հավասար իրավունքներ ունեն, Վարդան Ղուկասյանն արձագանքեց. «Ո՛չ, բոլոր մարդիկ հավասար իրավունքներ չունեն, դա Եվրոպայում է: Իսկ մեր Հայաստանում մեր ավանդականն ավելի կարեւոր է, քան այդ ամեն ինչը, որ դուք բերում եք: Այդպիսիններին ընդհանրապես, ինչքան ես հիշում եմ, մեր ապրած կյանքով, դրանց տեղ չեն տվել: Հիմա եթե ուզում եք եվրոպական այդ բարքերը բերել Հայաստան, չարաչար սխալվում եք: Այստեղ կան մարդիկ, որոնք դրանց դեմ են, մեծամասնությունը դեմ է: Այլասերված վարքուբարքովները թող գնան Հոլանդիայում ապրեն, ոչ թե Հայաստանի Հանրապետությունում: Եվրոպան էսօր դատարկվում է, աճ չունի, եթե կանայք իրար հետ են ամուսնանում, տղաները՝ իրար հետ, 70 տոկոս աճը կտրել է, ծնելիություն չկա: 10 տարվա ընթացքում, ստատիստիկա կա, Եվրոպան դատարկվում է, դուք ուզում եք Հայաստանը ավիրե՞լ»:
ԲՀԿ-ական պատգամավորը խոսեց տրանսգենդեր լինելու մասին, ըստ նրա, դա ոչ միայն մարմնի մեղք է, այլ՝ հոգու. «Դառնում ենք Սոդոմ-Գոմոր քաղաքները, դա ամենամեծ մեղքերից մեկն է, որ Աստծո զայրույթն է բերում մեր երկրի վրա, ի՞նչ ենք ուզում, չե՞նք բավարարվում ինչ Աստված տվել է, դրանով, այլասերվածության չափ ու սահման կա վերջիվերջո…Ընդհանրապես մի բան գիտեմ՝ դրանց պետք է հասարակությունից հեռու պահել»:
Կարդացեք նաև
Լրագրողներ հարցրեցին՝ բռնության կոչե՞ր է անում պատգամավորը՝ Ղուկասյանն արձագանքեց. «Շատ ճիշտ ենք անում եւ հերիք է սուտ դեմոկրատական բաներով երկիրը խառնեք իրար: Ես բռնության կողմնակից չեմ, բայց այդ այլասերվածներին Հայաստանից վտարելու կողմնակից եմ: Էգը էգ պիտի լինի, որձը՝ որձ, հիմա էգն ու որձը խառնել եք իրար, էդպես չի կարելի չէ՞, վերջը ամոթ է: Եվրոպա, Եվրոպա, հասկացանք Եվրոպա, Եվրոպան էլ չափ ու սահման ունի»:
Պատգամավորը գտնում է, որ քահանան պետք է գա ԱԺ եւ օրհնի ԱԺ այն ամբիոնը, որտեղ ելույթ է ունեցել տրանսգենդերը. «Ես շատ վատ եմ զգում, որ էդ սրբապիղծն այդտեղից ելույթ է ունեցել, մենք էլ պիտի ելույթ ունենանք»:
Հռիփսիմե ՋԵԲԵՋՅԱՆ
