Մարդու իրավունքների եվրոպական դատարանը որոշում է կայացրել «Միրզոյանն ընդդեմ Հայաստանի» գործով՝ Հայաստանին պարտավորեցնելով Միրզոյանին վճարել 15 հազար եվրո՝ որպես բարոյական վնասի փոխհատուցում:
Ռոբերտ Միրզոյանը Ստրասբուրգի դատարան էր դիմել բանակում սպանված որդու՝ Գեղամ Սերգոյանի գործով: Վերջինս սպանվել էր 2007թ. Լեռնային Ղարաբաղում պարտադիր զինվորական ծառայության ժամանակ գլխին ստացած հրազենային վնասվածքից: Սպան, որը կրակել էր նրա վրա, ընդունել էր մեղքը և 2009թ. դատապարտվել 15 տարվա ազատազրկման:
Այնուամենայնիվ, առաջին ատյանի դատարանը մերժել էր պետությունից փոխհատուցում ստանալու Միրզոյանի քաղաքացիական հայցը՝ գտնելով, որ օրենքը չի սահմանում բարոյական վնասի փոխհատուցում: Հայցը մերժել էին նաև Վերաքննիչ և Վճռաբեկ դատարանները:
Դրանից հետո Միրզոյանը դիմել էր Մարդու իրավունքների եվրոպական դատարան՝ բողոքով, որ պետական մարմինները չեն կարողացել պաշտպանել իր որդու կյանքի իրավունքը, և որ որդու կորստյան հետևանքով իրեն հասցված բարոյական վնասի փոխհատուցումը մերժվել է:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
