«Ժողովրդի համաձայնությունը կլինի`կբացենք, չի լինի`չենք բացի»,- խորհրդարանում լրագրողների հետ զրույցում ասաց ԲՀԿ խմբակցության ղեկավար Գագիկ Ծառուկյանը` ներկայացնելով իր եւ կուսակցության դիրքորոշումը`Ամուլսարի հանքի շահագործման հետ կապված: «Եթե ժողովուրդն այնտեղ ապրում է, ապրելու է`ո՞նց կարելի է ժողովրդի կարծիքը հաշվի չառնել: Մենք այսօր ասում ենք` իշխանությունը ժողովուրդն ա»,- ասաց նա` հավելելով, որ պետք է մարդկանց ներկայացնել ճշմարտությունը եւ եթե մարդիկ համաձայնություն կտան`հանքը կշահագործվի, եթե`ոչ, ապա պետք է չշահագործել:
Եթե հասարակության կարծիքը հաշվի չառնվի, ըստ Գագիկ Ծառուկյանի, լավ բան չի լինի. «Խոսում ենք ժողովրդավարություն…»:
Լրագրողների հարցերին, որ տնտեսության զարգացման մասին էլ է խոսքը, Գագիկ Ծառուկյանը պատասխանեց, որ դրա համար էլ պետք է լուրջ քննարկումներ եւ ուսումնասիրություններ կատարվեն: Նա գտնում է, որ իշխանությունն այսօր բավական լուրջ խնդրի առաջ է կանգնած`հանքի շահագործման-չշահագործման մասով:
Հարցին`դուք դե՞մ եք ՀՀ տնտեսությունը հանքարդյունաբերությամբ զարգացմանը, ունի՞ մեր տնտեսությունը նման հնարավորություն եւ արդյոք պատրաստ եք ձեր հանքերը փակել`հանուն ՀՀ քաղաքացու առողջության, Գագիկ Ծառուկյանը պատասխանեց. «Դուք չկասկածեք»:
Կարդացեք նաև
Նա ասաց, որ երկու հանք ունի եւ եթե կառավարիչներն ասեն, որ խնդիր կա, որ մարդիկ դժգոհ են, անպայման կփակի. «Մեզ մոտ ցիանիդ չի օգտագործվում, ցիանիդը վտանգավոր է, եղել են դեպքեր, որ մարդիկ, կենդանիներ են մահացել: Մեզ մոտ ընդամենը ջրով լվացման պրոցես է կատարվում, բայց եթե ես իմանամ, որ դա վնաս է իմ ժողովրդին, բնությանը…»
Մանրամասները` տեսանյութում
Նելլի ԳՐԻԳՈՐՅԱՆ
