Լրագրողի հարցին՝ նախադեպ ենք ունեցել, որ վարչապետը մարդկանց կոչ արեց՝ շրջափակել դատարանները, ամսի 12-ին եթե Ռոբերտ Քոչարյանը կալանքից ազատվի, մտավախություն չունե՞ք, որ դեպքն էլի կարող է կրկնվել, Քոչարյանի աջակից Վահե Եփրիկյանը պատասխանեց. «Վարչապետի կոչերը փորձել մեկնաբանել, բարդ է, առավել եւս՝ կանխատեսել այդ կոչերը եւ կանխատեսումները փորձել մեկնաբանել: Այնուամենայնիվ, ես ինքս փաստել եմ այն, որ մեր վարչապետի այդ կոչը հենց սահմանադրական կարգի տապալում է, որովհետև, ըստ էության, Հայաստանի Հանրապետությունում այդ կոչի արդյունքում դատական իշխանությունը մի քանի ժամ, ըստ էության, չի աշխատել, եւ Սահմանադրության 2-րդ, 4-րդ հոդվածներն այդ կերպ խախտվել են: Այսինքն, վարչապետը ուղղակիորեն տապալել է սահմանադրական կարգը: Այդ առումով, դա իմ ներքին սուբյեկտիվ համոզմունքն է:
Ինչ վերաբերում է հնարավորությանը, կոչ կանեմ եւ վարչապետին եւ առհասարակ բոլորին՝ չգնալ նման ռադիկալ քայլերի, որովհետեւ, միեւնույն է, դրանից ոչ մի բան չի փոխվելու, սահմանադրական դատարանի մակարդակով: Կարծում եմ՝ Եվրոպական դատարանի, Վենետիկի հանձնաժողովի արդյունքները լինելու են դրական: Եվ վաղ թե ուշ, այն իրավախայտառակությունը, որի մեջ գտնվում ենք մեկ տարի շարունակ, ավարտվելու է»:
Աշոտ ՀԱԿՈԲՅԱՆ
