Aravot.am-ի տեղեկություններով՝ նախկին ոստիկանապետ Հայկ Հարությունյանի հետ Բջնիի իր առանձնատանը եղել է մի հոգի, նա վարույթ իրականացնող մարմնին խնդրել է չբացահայտել իր ինքնությունը հանրությանը:
Ոստիկանապետն ինքնասպանություն գործելուց առաջ իր հետ գտնվող անձի հետ ունեցել է անձնական զրույց: Մեր տեղեկություններով՝ Հայկ Հարությունյանն ուներ առողջական խնդիրներ, ինչը նա շատ ծանր էր տանում, ինչի պատճառով արդեն վաղուց սկսել էր ալկոհոլ օգտագործել:
Նախկին ոստիկանապետը կարո՞ղ էր ինքնասպանություն գործել հիվանդության պատճառով. նրա գործընկեր ՀՀ նախկին ոստիկանապետ Ալիկ Սարգսյանը մեզ հետ զրույցում ասաց՝ ճանաչելով նրան, կարող է վստահեցնել՝ չէր կարող. «Ինքը պինդ մարդ էր, կամային լուրջ հատկանիշներ, ուժեղ բնավորության գծեր ուներ, չեմ կարծում, որ առողջության հետ կապված խնդիրները նրան տանեին այդ քայլին: 3 ամիս առաջ ենք հանդիպել, մի տասը րոպե զրուցեցինք, որոշեցինք հանդիպել , բայց չստացվեց: Չեմ տեսել նրան, առողջության մասին էլ տեղեկություն չունեմ: Գիտեմ՝ պինդ, ամուր, սպորտսմեն տղա էր: Հեռուստատեսությամբ լսեցի, որ իբր քաղցկեղ է ունեցել, ես տեղյակ չեմ»:
Արփինե ՍԻՄՈՆՅԱՆ
