Այսօր կառավարության նիստին, երբ ներկայացվում էր նախագիծը՝ պետական գնումներին մասնակիցներին, այսպես ասած՝ բանկային երաշխիք ներկայացնել պարտադրելու վերաբերյալ, բուռն քննարկում եղավ: Վարչապետը նույնիսկ զայրացավ, թե կարեւոր խնդիրի վերաբերյալ որոշման շուրջ ինչ-որ տարաձայնություններ կան: Նիկոլ Փաշինյանը նաեւ նշեց, որ այս որոշումը դեռ ամիսներ առաջ պետք է ընդունած լինեին:
Կառավարության անդամներից մեկը մտահոգություն հայտնեց, թե նոր ստեղծված կամ ստարտափ ընկերությունների համար այս նախագծի ընդունումից հետո խնդիրներ կառաջանան՝ բանկային երաշխիք ստանալու առումով:
Փաշինյանն էլ նկատեց՝ եթե հետագայում կլինեն խնդիրներ, կրկին կքննարկեն. «Մենք հիմա, ըստ էության, նոր ինստիտուտ ենք ներդնում: Եկեք պատճառներ չփնտրենք՝ ասելով, որ ռիսկեր կառաջացնի։ Եթե առաջացնի, կկառավարենք։ Եկեք բարձր նշաձող դնենք, տեսնենք՝ ինչ է տեղի ունենում, չենք կարա թռնենք էդ նշաձողով, կիջեցնենք»։
Վարչապետը դիտարկմամբ՝ կարող են այս փոփոխության արդյունքում բացահայտվել դեպքեր, որ շատ ընկերություններ իրականում ընկերություն չեն. «Պետք է հրաժարվենք էս բանից, թե չէ ամեն անգամ այդ ընկերությունների հետ գործ բռնելիս մեզ վրա 10 անգամ թանկ է նստում ամեն ինչը։ Շինծու մասնակցությունների հարցը սրանով լուծվում է, ոչ մի «ֆեյք» ընկերություն չի կարող այսուհետ պետգնումներին մասնակցել, թող գնան բերեն բանկային երաշխիք»:
Կարդացեք նաև
Նելլի ԲԱԲԱՅԱՆ
