Տեղեկություններ կային, որ վարչապետը նոր մեքենա է գնել 540 հազար դոլարանոց: Լրագրողներն այսօր կառավարության աշխատակազմի ղեկավար Էդուարդ Աղաջանյանին հարցրեցին, թե քանի՞ նոր զրահապատ մեքենա է գնվել:
Աղաջանյանն ասաց, որ վստահ չի, որ այդ տեղեկությունը պետք է հրապարակի, իրավաբանների հետ կխորհրդակցի:
Մեր հարցին՝ երբ բյուջեի հաշվին բան է գնվում, թափանցիկ գործելաոճ որդեգրած կառավարությունն ինչո՞ւ է գաղտնի պահում՝ Աղաջանյանը պատասխանեց. «Նախ, գործող օրենք կա, որը վերաբերում է ընթացիկ ներկայացուցչական ծախսերին, որը գաղտնի է, կարելի է քննարկել այդ օրենքի փոփոխման հարցը: Պետք է արձանագրել, որ դրան զուգահեռ կան անվտանգության նորմեր, որոնք այդ օրենքի շրջանակներում պահպանվում է, դա կարեւոր բաղադրիչն է այդ օրենքի»:
Հարցին՝ մտահոգություն չունե՞ք, որ այս ճոխ գնումները հանրության մոտ տրամադրություն են ստեղծում, քանի դեռ դուք եք իշխանության, օգտվում եք դրանից՝ Աղաջանյանը պատասխանեց. «Պետք է արձանագրել, որ այն մեքենան, որը սպասարկում էր վարչապետին, բավականին, մեղմ ասած հին, շարքից դուրս ավտոմեքենա էր, որը դեռեւս 5 եւ ավել տարի առաջ պետք է ուղղակի դուրս գրվեր, նաեւ լուրջ անվտանգության խնդիրներ առաջացնող մեքենա էր»:
Կարդացեք նաև
Ճշտեցին՝ այսինքն, նախկինները խնայում էին միջոցները եւ նոր մեքենա չէի՞ն գնում՝ Աղաջանյանը պատասխանեց, որ այդ ավտոմեքենան այնտեղ դրված էր, չէին օգտագործում. «Նախկիններն իրենց սպասարկողներն ունեին, Սերժ Սարգսյանն իր անհատական ավտոմեքենան ուներ, իրենն էր՝ սեփականը»:
Աղաջանյանն ասաց, որ Լեւոն Տեր-Պետրոսյանին, Ռոբերտ Քոչարյանին եւ Սերժ Սարգսյանին կառավարությունն ապահովում է մեքենաներով, անվտանգության աշխատակիցներով: Հարցին՝ օգտվո՞ւմ են՝ նա պատասխանեց. «Չգիտեմ, բայց նրանց տրամադրված է»:
Հռիփսիմե ՋԵԲԵՋՅԱՆ
