ԱԺ-ն այսօր քննարկում է կառավարության օրինագիծը, որը սահմանում է՝ պետության հատկացրած սոցիալական բնակարաններում բնակվող միայնակ տարեցների կոմունալ վճարումները կիրականացնի պետությունը: Ինչպես ներկայացրեց Աշխատանքի եւ սոցիալական հարցերի նախարարի տեղակալ Գեմաֆին Գասպարյանը (լուսանկարում), պետությունը միայնակ տարեցներին միայն բնակարան է տալիս, իսկ կոմունալ խնդիրները լուծում են իրենք. «Սակայն կենսաթոշակը չի բավականացնում կոմունալների վճարմանը եւ այլ խնդիրներին: Մեծ պարտքեր կան կուտակված»:
Փոխնախարարը տեղեկացրեց, որ այս պահին Մարալիկի եւ Երեւանի սոցիալական բնակարաններում ապրում են 59 միայնակ տարեցներ, որոնց կոմունալ ծախսերի տարեկան փոխհատուցման շնորհիվ նրանք կխնայեն մոտ 144 000 դրամ եւ կկարողանան գումարն ուղղել սննդի եւ այլ կարիքները հոգալուն:
Հավելենք, որ օրինագիծը դեռ պետք է քվեարկվի ԱԺ նիստում:
Լուիզա ՍՈՒՔԻԱՍՅԱՆ
