«Հոլանդիա»-ն դադարեց գոյություն ունենալ որպես երկրի անվանում: Այս մասին հաղորդել է նիդեռլանդական NOS ռադիոկայանը:
2020 թվականի հունվարի 1-ից երկրում պաշտոնապես հրաժարվել են «Հոլանդիա» անվանումն օգտագործելուց: Մասնավոր ընկերությունները, դեսպանությունները, նախարարությունները, դպրոցները և համալսարանները կօգտագործեն միայն «Նիդերլանդներ» պաշտոնական անվանումը:
Երկրի «իմիջը» փոխելու այս բարեփոխումը պետության վրա «նստել է» 200 հազար եվրո:
Այն մասին, որ Նիդեռլանդները հրաժարվել է իրեն Հոլանդիա անվանել, հայտարարվել էր դեռ անցյալ տարի հոկտեմբերին:
Կարդացեք նաև
Իշխանությունները մտահոգված էին, որ «Հոլանդիա»-ն զբոսաշրջիկներն ասոցացնում են թմրանյութերի և Կարմիր լապտերների թաղամասի հետ` տարածքի, որտեղ բարգավաճում է սեռական արդյունաբերությունը: Մինչդեռ Նիդեռլանդները ցանկանում է ներկայանալ որպես առաջատար տեխնոլոգիաների երկիր:
Եվ երկրի «իմիջը» փոխելու համար առաջարկվել էր ակտիվորեն օգտագործել «Նիդեռլանդներ» անվանումը 2020 թվականին Տոկիոյում կայանալիք օլիմպիական խաղերի և «Եվրատեսիլ 2020»-ի ժամանակ:
Դեռ փետրվարին Ֆեմկե Խալսեման` Ամստերդամի առաջին կին քաղաքապետը, հայտարարել էր, որ մարմնավաճառությունը զբոսաշրջային գրավչություն դարձնելը նվաստացուցիչ է և անընդունելի: Ի թիվս այլ բարեփոխումների նա առաջարկել էր Կարմիր լապտերները չներառել տուրիստական ուղղությունների ցուցակում, քանի որ զբոսաշրջիկների հոսքը բարդացնում է Կարմիր լապտերների մարմնավաճառների աշխատանքը և սպառնում նրանց անվտանգությանը:
Խալսեման նշել էր, որ Ամստերդամի այդ «ավանդույթը» գնալով ավելի շատ է կապվում ճանապարհորդների կողմից կանանց նվաստացման հետ:
