Թբիլիսիում Վրաստանի հայ համայնքի ներկայացուցիչների հետ հանդիպման ժամանակ վարչապետ Նիկոլ Փաշինյանը իր կադրային քաղաքականության մեջ տեղ գտած թերությունների մասին խոսելիս կրկին իր եւ Հիսուսի միջեւ համեմատություն անցկացրեց.
«Իհարկե, մեր կադրային քաղաքականությունը իդեալական չէ…Վերջերս, երբ խոսում էի դավաճանության եւ դավաճանների մասին, որոնք նույնպես եղել են եւ հնարավոր է՝ լինեն մեր իշխանության մեջ, մասնավորապես, իրավական համակարգում, ըստ էության դա էլ է սխալի ընդունել եւ խոստովանություն է: Բայց հետո էդ թեմայով, երբ մեկ-մեկ մտածում, տանջվում եմ, մի ձեւի օգնության է գալիս Սուրբ Գիրքը՝ Ավետարանը: Որ ասում եմ՝ դու ի վիճակի չես էնպիսի կադրային քաղաքականություն վարես, որ դավաճանություն չլինի, որքանով ես ի վիճակի ղեկավարել կառավարությունը, երկիրը, ու Սուրբ Գիրքն ինչո՞վ է օգնության գալիս. ասում եմ՝ նույնիսկ Հիսուս Քրիստոսի ընտրած կադրերի մեջ, պարզվեց, դավաճաններ կան: Էնպես որ, եթե նույնիսկ Հիսուսն ի վիճակի չի եղել անդավաճան կադրային քաղաքականություն վարել, մեծամտություն կլինի մտածել, թե որեւէ վարչապետ, կամ կոնկրետ ես կարող եմ էդպիսի քաղաքականություն վարել»,-ասաց վարչապետը:
Աշոտ ՀԱԿՈԲՅԱՆ