«Ըստ էության, դիմավորմանը հաջորդած խոսակցություն է եղել, քննարկում չի եղել։ Իրանի փոխնախագահը ՀՀ է այցելել միջկառավարական նիստի նախագահման շրջանակներում։ Նիստի արդյունքների մասին հաղորդագրություն կտարածվի»,-լրագրողների հարցին՝ Իրանի փոխնախագահի հետ ԹՐԻՓՓ-ի հետ կապված խոսակցություն եղե՞լ է, ճեպազրույցում այսպես պատասխանեց ՀՀ տարածքային կառավարման և ենթակառուցվածքների նախարար Դավիթ Խուդաթյանը։
Ասաց, որ Իրանի փոխնախագահի հետ կարճ զրույց է ունեցել, որի ընթացքում անդրադարձ է կատարվել Կապանի ենթակառուցվածքային ծրագրի շինարարական աշխատանքների ընթացքին։
Հարցին՝ 2027-ին ԹՐԻՓՓ-ի հետ կապված հատկացումներ ՀՀ պետական բյուջեից չե՞ն լինելու, Դավիթ Խուդաթյանը պատասխանեց․ «Մենք ԹՐԻՓՓ-ի ֆինանսավորումը պատկերացնում ենք այլ մոդելով՝ ԹՐԻՓՓ-ի զարգացման ընկերության ֆինանսավորման հաշվին, բայց մենք նաև հրապարակային հայտարարել ենք, որ սկսում ենք ԹՐԻՓՓ-ի որոշ ենթակառուցվածքների նախագծերի ձեռքբերման աշխատանքները։ Վարչապետն ասել է, որ իր հանձնարարությամբ՝ արդեն սկսում ենք նախագծման աշխատանքները»։
Կարդացեք նաև
Հարցին՝ գազի գնի փոփոխման հավանականության հետ կապված ՌԴ-ից ստացված նամակին ինչպե՞ս են պատասխանեց, Դավիթ Խուդաթյանը պատասխանեց․ «Մենք նամակին պատշաճ պատասխանել ենք։ Այո, այդ նամակով չի բացառվում՝ գազի գնի թանկացման հնարավորությունը։ Թույլ տվեք մեր պատասխանի մանրամասները չասեմ»։
Փաստմանը՝ գազի գնի հետ կապված 2027-ի առաջին եռամսյակում գազի գնի պայմանագիրն ավարտվում է և հարցին՝ այդ պայմանագիրը շարունակելու քննարկումներ կա՞ն, Դավիթ Խուդաթյանն արձագանքեց․ «Գազի գնի հետ կապված հարցերը նախարարության համակարգման տիրույթում չեն, բավարար չափով տեղյակ չեմ, որ դրան տամ այնպիսի պատասխան, որը խուճապ առաջացնող վերնագիր չդառնա»։
Ընդդիմադիր ուժերի՝ ընդդեմ Սահմանադրության փոփոխության իրազեկման արշավի առիթով էլ նշեց․ «Անկախության հռչակագրի հղման ո՞ր մասն է ընդդիմությանը մտահոգում՝ ՀՀ-ի և ԼՂ-ի միավորո՞ւմը։ Իրենք ուզո՞ւմ են ՀՀ-ն ու ԼՂ-ն միավորել։ Չի կարող ՀՀ-ի մայր օրենքում լինել իրականությունից կտրված այնպիսի ձևակերպում, որը խնդրահարույց է։ Եթե իրենք ուզում են, որ ԼՂ-ն ու ՀՀ-ն միավորեն, թող դրա մասին ասեն»։
Դավիթ Խուդաթյանի ճեպազրույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
