Մարտի 5-ին Երեւանի ընդհանուր իրավասության դատարանի Շենգավիթի նստավայրում (նախագահող դատավոր Ռոբերտ Պապոյան) տեղի ունեցավ Մասիսի քաղաքապետի եւ մյուսների գործով հերթական դատական նիստը: Շարունակվեց տուժողների հարցաքննությունը: Նիստին ներկա էր նաև Մասիսի քաղաքապետ Դավիթ Համբարձումյանը:
Հիշեցնենք, որ այս գործով մեղադրյալները մեղադրվում են Թավշյա հեղափոխության օրերին ցուցարարների դեմ իրականացրած բռնությունների, խուլիգանության, գույքի վնասման դրվագներով:
Դատարանի դահլիճում Հայանիստ և Հովտաշատ գյուղերի խաչմերուկում տեղի ունեցած միջադեպի հետ կապված դատարանի դահլիճում հարցաքննվեցին տուժողներ Արա Պողոսյանն ու Աբրահամ Ինժիղուլյանը: Նրանք դատարանի դահլիճում հերքեցին Դավիթ Համբարձումյանի մասնակցությունն այդ միջադեպին: Նրանք հայտարարեցին, որ Դավիթ Համբարձումյանին այնտեղ չեն տեսել:
Մեղադրող դատախազը հետաքրքրվեց՝ այդ դեպքում ինչո՞ւ էին Դավիթ Համբարձումյանի անունը սկզբում նշել, բայց հիմա հերքում են, տուժողները պատասխանեցին, որ ուրիշների խոսքերից է դա եղել. իրենք չեն տեսել Դավիթ Համբարձումյանին:
Կարդացեք նաև
Տուժողների հարցաքննությունից հետո նախագահող դատավորը հետաձգեց նիստը: Հաջորդ դատական նիստը տեղի կունենա մարտի 19-ին՝ ժամը 11.30-ին:
Aravot.am-ի հետ զրույցում Դավիթ Համբարձումյանի պաշտպան Տիգրան Աթանեսյանը նշեց, որ այս գործով այս միջադեպը միակն է, որը մեղսագրվում է Դավիթ Համբարձումյանին և հավելեց. «Իմ պաշտպանյալները վեցն են, գոնե Դավիթ Համբարձումյանի մասով կարող եմ ասել, որ նա իրեն մեղսագրված արարքում անմեղ է և պետք է արդարացվի»:
Հարցին՝ այդ գործում քաղաքական ենթատեքստ տեսնո՞ւմ է, Տիգրան Աթանեսյանը պատասխանեց`ոչ:
Մեր հարցին՝ գործով նոր դրվագներ, հանգամանքներ ի հայտ եկե՞լ են, Տիգրան Աթանեսյանը պատասխանեց. «Սա այն գործը չէ: Սա հնարովի գործ է և ոչ մի նոր հանգամանք լինել չի կարող»:
Տաթև ՀԱՐՈՒԹՅՈՒՆՅԱՆ
