Նիկոլ Փաշինյանի քաղաքական շահերը նրան թելադրում են անպայման հանրաքվե անել,- «Հայելի» մամուլի ակումբում ասաց «Այլընտրանք» ՀԿ համանախագահ Նարեկ Մանթաշյանը ՝ ներկայացնելով հանրաքվեի բոյկոտի քաղաքական մեկնարկը:
«Փաշինյանն ասում էր՝ կորոնավիրուսը կարող ենք «պինցետով» վերցնել, երկու անգամ արդեն թեստ է փչացրել»,- ասաց Նարեկ Մանթաշյանը:
Ըստ Մանթաշյանի՝ վարչապետը իրեն հաճո կամ տհաճ իրավիճակներում գտնում է մեղավոր, որպեսզի ամբողջ մեղքը բարդի իրենց վրա. «Այդպես եղավ Էջմիածնի հայտնի իրադարձությունների կնոջ դեպքում: Ուզում եմ ասել, որ նա սովորական քաղաքացի է, որը վստահում է կառավարությանը: Երբ կառավարությունը հայտարարում է, որ վիրուսը իրենից ոչինչ չի ներկայացնում և տեսնում ես, որ երկրի ղեկավարը մասսայական միջոցառումներ է կազմակերպում, քարոզարշավ անում, հետևաբար, ցանկացած քաղաքացի կարող է սթափ չգնահատել ինքնազգացողությունը և կազմակերպել իր միջոցառումը»:
Անդրադառնալով արտակարգ դրություն մտցնելուն և հանրաքվեին` Նարեկ Մանթաշյանը ասաց. «Նիկոլ Փաշինյանը վախենում է որոշում կայացնելուց, խուսափում է պատասխանատվությունից, իսկ Կառավարությունը անպատասխանատու վերաբերմունք է ցուցաբերում և արտակարգ իրավիճակ չի հայտարարում և չի չեղարկում հանրաքվեն»:
Կարդացեք նաև
«Մենք օբյեկտիվորեն ահազանգում ենք, որ պետությանը վտանգ է ապառնում, նրանք ասում են, թե խուճապ ենք առաջացնում և ցանկանում ենք տապալել հանրաքվեն, հակահեղափոխական գործողություն է և այլն: Լավ կամ վատ ղեկավարը որոշվում է արտակարգ իրավիճակների ժամանակ, այժմ մեր ղեկավարը չակերտավոր հրաշալի է»,- ասաց «Այլընտրանք» ՀԿ համանախագահ Գարեգին Պետրոսյանը:
Ըստ նրա` կտրուկ գործողությունների գնալու և արտակարգ իրավիճակ հաստատելու համար պետք է՝ համարձակություն, համակարգված գործողությունների կամք, փորձ և գիտելիքներ, որոնց բացակայությանը մենք ականատես եղանք:
Հիշեցնենք, որ քիչ առաջ կառավարությունը Նիկոլ Փաշինյանի գլխավորությամբ որոշում ընդունեց, ըստ որի` երկրում հայտարարվում է արտակարգ դրություն մինչև ապրիլի 14-ը:
Նոնա ՂԱԶԱՐՅԱՆ