«Պետությունը, որպես ընտանիքի հայր, պետք է մտածի իր աշխատողի թոշակի մասին»,-լրագրողների հետ ճեպազրույցում այսօր հայտարարեց ԲՀԿ առաջնորդ Գագիկ Ծառուկյանը:
Հիշեցնենք՝ այսօր նա վրդովվել էր հարցադրումներից, որ արտակարգ դրությամբ պայմանավորված՝ նաեւ իր որոշ ձեռնարկությունների աշխատակիցներ ստիպված տանն են, սակայն Ծառուկյանը նրանց չի պատրաստվում վճարել:
Գագիկ Ծառուկյանը համոզմունք հայտնեց՝ ով որոշել է երկրում արտակարգ դրություն հաստատել, նա էլ պետք է մտածի հարկադրաբար աշխատանքի չգնացող քաղաքացիներին վճարելու մասին:
-Օրինակ, «Շանգրիլա»-ն չի աշխատում, որեւէ աշխատող չի վճարվում,-հետաքրքրվեցին լրագրողները:
Կարդացեք նաև
-Ուրեմն, «Շանգրիլա»-ի հարկերն էլ պետք է պետությունը վճարի, ժողովրդի աշխատավարձն էլ: Հասկացա՞ք, թե ոչ: Աղջիկ ջան, կառավարիչն արտասահմանցի է, դու հասկանո՞ւմ ես, թե ոչ,-պատասխանեց Ծառուկյանը:
-Բայց դուք եք սեփականատերը:
-Ես փայատեր եմ, աղջիկ ջան: Թող գնան արտասահմանցիների հետ պայմանավորվեն, ես ի՞նչ կապ ունեմ:
-Վարկերի խնդրի լուծումը ինչպե՞ս եք տեսնում:
-Եթե արտակարգ իրավիճակ է հայտարարված, բոլոր վարկերը պետք է երեք ամսով սառեցվեն: Տնտեսությունն այսօր անդունդի եզրին է:
-Եթե խոշոր սեփականատերերը ձեռքերը լվանում են այս ամենից եւ ամեն ինչ թողնում պետության վրա, այդ դեպքում պետությունն ինչպե՞ս է դուրս գալու տնտեսական շոկից:
-Աղջիկ ջան, դու որ խոսալուց հարց ես տալիս…եթե, ասենք, Ծառուկյանը տվեց…հիմա ունենք, ասենք թե, 70 հազար ՓՄՁ-ներ, որոնցից յուրաքանչյուրում 30-50 մարդ է աշխատում: Եթե մարդը չի կարողանում ապրի, սեփականատերը ո՞նց է տալու այդ գումարը:
-Բայց դուք այդ խնդիրը չունեք, չէ՞:
-Ասենք՝ չունեմ, ես տվեցի: Դուք առիթ եք ման գալիս: Ծառուկյանն օրինակ է ծառայել եւ ծառայում է: Ասողին լսող է պետք, ստորակետ եք ուզում գտնել Ծառուկյանի վրա: Ծառուկյանի ասածները եթե չանեն, դատարկ տաշտակի առաջ են մնալու, ուրի՞շ:
-Համ բարեգործությունից եք խոսում, համ ասում եք, որ ձեր չաշխատող աշխատակիցներին այս ընթացքում չեք պատրաստվում վճարել:
-Աղջիկ ջան, ես ձեր հարցերին պատասխանում եմ: Դու պետության հարցը թողած…Ծառուկյանը պետություն չի, սեփականատեր է: Պետությունը թող անի, մենք էլ հնարավորության սահմանում կաջակցենք:
-Եթե մի ամիս վճարեք ձեր աշխատողներին, կսնանկանա՞ք:
-Ներողություն, աղջիկ ջան, դու իմ մասին մի մտածի: Դու մնացածի մասին մտածի, քո ղեկավարության մասին մտածի: Ծառուկյանն իր աշխատողներին անպայման կպահի: Ծառուկյանն անկախ ամեն ինչից իր ժողովրդի եւ կոլեկտիվի կողքին է: Ես միշտ էլ օգնել եմ եւ օգնելու եմ, բայց այսօր օգնելով երկիր չես պահի: Այսօր լուրջ քայլեր են պետք, որ բոլորը կարողանան այս իրավիճակից դուրս գալ:
Հիշեցնենք, որ կորոնավիրուսի տարածումը կանխարգելելու նպատակով ՀՀ-ում մինչեւ ապրիլի 14-ը հայտարարված է արտակարգ դրություն:
Լուիզա ՍՈՒՔԻԱՍՅԱՆ
